ԵՐԵՎԱՆ, 10 փետրվարի- Sputnik. Լեգենդար ֆրանսահայ շանսոնյե Շառլ Ազնավուրը The National-ին տված հարցազրույցում ասել է, որ հումորի զգացումն օգնել է իրեն հաղթահարել դժվարությունները։
Նա խոստովանել է, որ սիրում է հիշել իր ընտանիքի ու մանկության մասին։
Շառլ Ազնավուրը ծնվել է 1924թ. մայիսի 22-ին Փարիզում` Հայոց ցեղասպանությունից փրկված Միշա և Քնար Ազնավուրյանների ընտանիքում։ Ընտանիքը, այդ թվում ավագ քույրը` Աիդան, մտադիր էին տեղափոխվել ԱՄՆ, սակայն նրանց այդպես էլ մուտքի արտոնագիր չտվեցին, ու նրանք մնացին Փարիզում։
«Ինչպես բոլոր արևելյան մարդիկ, իմ ընտանիքի անդամները ևս շատ համերաշխ էին։ Ես լավ պատանեկություն եմ ունեցել, նույնիսկ երբ ծանր շրջան եմ ապրել, միշտ ունեցել եմ ընտանիքիս և այլ ներգաղթյալների աջակցությունը։ Ես շնորհակալ եմ նրանց այն ամենի համար, ինչ նրանք տվել են ինձ»,- ասել է Ազնավուրը։
Նա ամուսնացել է երեք անգամ, ունի վեց երեխա։
«Ամենացավալի հիշողություններից մեկը կապված է 1970-ական թթ.-ին որդուս` Պատրիկի կորստի հետ։ Ես չեմ սիրում խոսել այդ թեմայով, նախընտրում եմ պահպանել իմ անձնական կյանքի գաղտնիությունը»,- ասել է երգիչը։
Երիտասարդ տարիքում Ազնավուրին մերժում էին ցածր հասակի, անհրապույր արտաքինի (նա հաճախ է կատակում իր քթի մասին) և անսովոր խռպոտ ձայնի համար։ Սակայն երգիչը կարողացել է հաջողության հասնել։
«Ինձ ասում էին, թե ես չպետք է երգեմ, բայց ես շարունակում էի երգել, մինչև կոկորդս սկսում էր ցավել»,- պատմել է Ազնավուրը։
Ազնավուրը 91 տարեկան է, նկարահանվել է ավելի քան 60 ֆիլմում, գրել ավելի քան 1200 երգ, երգել 8 լեզվով և վաճառել ավելի քան 180 մլն ձայնագրություն։ Նրա ժանրը հեղափոխեց դասական ֆրանսիական շանսոնը՝ ստեղծելով «ազնավուրյան» ժանր՝ ֆրանսիական սոուլ երաժշտության` բլյուզի, ջազի, փոփի և լիրիկայի խառնուրդ։ Անցյալ ամիս նա People With Money ամսագրում գլխավորում էր 2015թ. ամենաբարձր վարձատրվող երգիչների ցուցակը՝ 46 մլն դոլար եկամտով։ Նրան հաճախ կոչում են «ֆրանսիական Ֆրենկ Սինատրա»։
Երաժիշտը խոստովանում է, որ երգերն իր երեխաներն են, և ինքը չունի առավել սիրելի ստեղծագործություններ։
«Դրանք ինձ համար հավասար են, բայց կան այնպիսիները, որոնցով ես հատկապես հպարտանում եմ։ Օրինակ` քիչ հայտնի L'instant Present երգը պատմում է անցնող ակնթարթի մասին, ինչը շատ բարդ է նկարագրել երգում»,- ասել է շանսոնյեն։
Ազնավուրը, սերտ կապեր ունենալով Հայաստանի հետ, խոստովանում է, որ իր սրտի երկիրը Ֆրանսիան է։
Այն հարցին, թե ինչ կփոխեր իր կյանքում, եթե հնարավոր լիներ, Ազնավուրը պատասխանել է. «Ես արդեն փոխել եմ քիթս 60 տարի առաջ։ Իսկ շրջապատող աշխարհի վերաբերյալ, որքան էլ ծեծված հնչի, բայց հիանալի կլիներ, եթե բոլոր մարդիկ ապրեին խաղաղության և ներդաշնակության մեջ»։
