ԵՐԵՎԱՆ, 8 փետրվարի – Sputnik, Լաուրա Սարգսյան. Վրացագետ Ալիկ Էրոյանցը նշեց, որ ռազմական ոլորտում հայ-վրացական հարաբերությունների խորացման միտումներ առայժմ չի տեսնում։
«Ռուս-թուրքական հարաբերությունների վատթարացումը կազդի հայ-վրացական հարաբերությունների վրա»,- նշեց վրացագետը։
Վրաստանը և Հայաստանը չիրագործված նախագծեր ունեն ռազմական ոլորտում, որոնց իրականացման ճանապարհին խոչընդոտ է դարձել երկու հարևան երկրների տարբեր ուղղվածությունները` Հայաստանը ՀԱՊԿ անդամ է, իսկ Վրաստանը վերջին մի քանի տարիներին ձգտում է ՆԱՏՕ-ի անդամ դառնալ։
Էրոյանցը մեկնաբանեց Վրաստանի պաշտպանության նախարար Թինաթին Խիդաշելիի` Հայաստանում արված հայտարարությունները։
Վրացագետի կարծիքով` Խիդաշելին ուղերձ է հղել թուրք գործընկերներին` «տեսեք, հայկական հարթակում ես խոսում եմ Թուրքիայի` Վրաստանի համար ունեցած դերի և նշանակության մասին»։
Ի տարբերություն հայ փորձագետի` Վրաստանում ռազմական ոլորտում երկկողմ համագործակցությանն այլ կերպ են նայում։
«Վրաստանն ու Հայաստանը ռազմական ոլորտում շփման ընդհանուր եզրեր ունեն։ Օրինակ`խաղաղապահ գործողություններին մասնակցությունը` ոչ միայն տարածաշրջանում, այլ նաև աշխարհում կայունություն և անվտանգություն ապահովելու նպատակով, ահաբեկչության դեմ պայքարը»,- ավելի վաղ Sputnik Արմենիայի թղթակցի հետ զրույցում նշել էր ռազմական հարցերի փորձագետ Վախթանգ Մաիսայան։
Նա նաև չէր բացառել վրացական տեխնիկան Հայաստան առաքելու հնարավորությունը։
Միաժամանակ, հայ զինծառայողները հերթական անգամ մասնակցում են գնդապետ Բեսիկ Քուտատելաձեի անվան լեռնային նախապատրաստման Սաչխերի դպրոցի միջանկյալ ձմեռային դասընթացին` ՆԱՏՕ-ի «Գործընկերություն հանուն խաղաղության» ծրագրի շրջանակում։
Դասընթացին մասնակցում են ՆԱՏՕ-ի անդամ երկրների և գործընկերների զինծառայողները` Վրաստանից, Թուրքիայից, Հայաստանից և Ուկրաինայից։ Նպատակը ձնային ռելիեֆում լեռնային տեխնիկայի կատարելագործումն է։
Դասընթացի շրջանակում կատարվել են հետևյալ առաջադրանքները` չտրորված ձյան վրայով դահուկներով, պարանների խրձով սահք, ձյան տակ մնացած մարդկանց որոնում և նրանց տարհանում, տեղափոխում մոտակա բուժկետ, ապաստարանի ապահովում ձյան վրա և այլն։
Սաչխերայի լեռնային նախապատրասման դպրոցի հրամանատար Իվանե Ցխադաձեի խոսքով` դասընթացի ընթացքում ստացած գիտելիքները թույլ կտան հետագայում անարգել հաղթահարել Վրաստանի բարձրլեռնային զանգվածները։
Դասընթացի առաջին փուլն անցկացվել է Ախալցխայի Օրպոլո զորավարժարանում։ Զինծառայողները լեռնային ռելիեֆում յուրացրել են զենքից կրակելու տեխնիկան։ Նրանք կրակել են` հաշվի առնելով տեղանքի բարձրությունը, քամու արագությունը և ուժը, ինչպես նաև խոնավությունը։
