ԵՐԵՎԱՆ, 6 փետրվարի — Sputnik. Վրացի հայտնի դերասան Վախթանգ Կիկաբիձեն «Միմինո» ֆիլմի իր գործընկերոջը՝ հանրաճանաչ հայ դերասան Ֆրունզիկ Մկրտչյանին բնորոշում է այսպես՝ «տխուր աչքերով ուրախ մարդը»:
Sputnik Գրուզիային տված հարցազրույցում նա պատմել է, թե ինչ զավեշտալի դեպքեր են եղել «Մի՛ տխրիր» ֆիլմի նկարահանումների ժամանակ:
Մի դրվագ կար, Մցխեթում էին նկարահանում, տաճարում: Ֆրունզիկը նայեց տաճարի պատերին, տեսավ հին վրացական գրառումները, ինչ-որ նմանություն գտավ հայկական գրերի հետ ու ասաց՝ այս եկեղեցին էլ են հայերը կառուցել:
«Ինչպե՞ս թե հայերն են կառուցել: Հասկանու՞մ եք՝ ես հավատացի նրա ասածին: Ու հետո անդադար մտածում էի՝ ինչպես պատասխան «հարված» հասցնեմ նրան: Ու եկավ «Միմինոյի» նկարահանումների ժամանակը, ապրում էինք «Ռոսիա» հյուրանոցում: Իսկ այնտեղ չգիտես ինչու հեռախոսները պատուհանագոգին էին դրված. պառկածդ տեղից պիտի վեր կենայիր ու վազեիր հեռախոսի մոտ: Ես զարթուցիչս լարեցի, գիշերվա չորսին արթնացա ու զանգեցի նրան: Լսափողում լսեցի վախեցած ձայնը: Ասացի՝ Ֆրունզիկ, ներիր, որ քեզ անհանգստացնում եմ, պարզապես ես հիմա հայերի մասին մի ծրագիր էի լսում «Ամերիկայի ձայնով»: Չեմ կարող քեզ չասել: Պարզվում է՝ հնագետները Հայաստանում մի քար են գտել, վրան գրված է՝ «Հայկական կոմսոմոլը 500 տարեկան է»: Ասացի ու չդիմացա, սկսեցի քրքջալ», — պատմել է Կիկիաբիձեն:
Հետո զգացել է, որ Ֆրունզիկը ոչ մի կերպ չի արձագանքում իր ասածին, հարցրել է՝ իսկ դու ինչու՞ չես ծիծաղում: «Իսկ այդ հնէաբանները չէի՞ն կարող քարը մի 3-4 ժամ ուշ գտնել»,- պատասխանել է Ֆրունզիկը:
«Այ այսպիսի հիմարություններ էինք անում», — ասել է Կիկաբիձեն:
Նա խոստովանել է՝ երբ ծանոթացել է Մկրտչյանի հետ, զարմացել է, որ տաղանդավոր դերասանն այդքան ծիծաղելի դեմք ունի ու միաժամանակ այդքան տխուր աչքեր:
«Շատ ավելի ուշ իմացա, որ ծանր կյանք է ունեցել, որ կինը մահացել է, աղջիկն էլ, տղան էլ, բոլորը… Նկարահանումներից հետո նա անհետանում էր: Ու՞ր էր գնում, ի՞նչ էր անում, մենք ոչինչ չգիտեինք: Ես նրան հարբած չեմ տեսել, առավոտյան նկարահանումներին սթափ էր գալիս: Հետո, երբ մենք արդեն մտերմացանք, հասկացա, որ խմում է: Վշտից», — հիշում է վրացի դերասանը:
Վախթանգ Կիկաբիձեի ամբողջական հարցազրույցը կարող եք կարդալ Sputnik Գրուզիայի կայքում:
