ԵՐԵՎԱՆ, 6 փետրվարի. Sputnik. Թուրքիայի նախագահի մամուլի քարտուղար Իբրահիմ Քալինը հայտարարել է, որ Թուրքիայի նախագահ Թայիփ Էրդողանը փորձում է հեռախոսակապ հաստատել Ռուսաստանի նախագահ Վլադիմիր Պուտինի հետ, սակայն այդ փորձերրը հաջողությամբ չեն պսակվում, հայտնում է ՌԻԱ Նովոստին՝ հղում անելով Anadolu գործակալությանը:
ՌԴ-ի և Թուրքիայի հարաբերությունները սրվել են 2015 թվականի նոյեմբերից 24-ից հետո, երբ թուրքական F-16 կործանիչը խոցել էր ռուսական Սու-24 ինքնաթիռը: Օդաչուներից մեկը զոհվել էր, մյուսը կարողացել էր փրկվել։
«Հունվարի 29-ին Ռուսաստանը հերթական անգամ խախտել է Թուրքիայի օդային տարածքը: Այդ դեպքից հետո Էրդողանը փորձում է հեռախոսազրույց ունենալ Վլադիմիր Պուտինի հետ, սակայն ռուսական կողմը չի արձագանքում»,- ասել է Քալինը:
Ավելի վաղ Թուրքիայի ԱԳՆ-ն հայտարարել էր, որ ՌԴ-ի ՌՏՈՒ-ի Սու-34 ինքնաթիռը խախտել է երկրի օդային տարածքը: ՌԴ պաշտպանության նախարարության ներկայացուցիչ Իգոր Կոնաշենկովը հայտարարել է, որ ռուսական ավիախումբը որևէ խախտում չի կատարել, և Թուրքիայի հայտարարությունը մերկապարանոց քարոզչություն է:
