Գոհար Սարգսյան, Sputnik.
Վաղը փողոցներում շատերն անճանաչելի կդառնան: Մեկընդմեջ հնարավոր կլինի տեսնել շուն ու կատվի և հայկական լեռնաշխարհին բնորոշ այլ կենդանիների դիմակներով երիտասարդների: Իսկ նախկինում մարդիկ անգամ մրով ու ալյուրով էին պատում դեմքերը, աղջիկները տղաների, իսկ տղաները՝ աղջիկների հագուստներ են կրել անճանաչելի դառնալու համար: Սա Բուն Բարեկենդանի տոնի մի մասն է կազմում:
«Պատարագ կմատուցվի բոլոր եկեղեցիներում: Արարատյան Հայրապետական թեմի առաջնորդանիստ Ս. Սարգիս եկեղեցու պատարագից հետո Երևանի 12 վարչական շրջանների պարողների ու դհոլահարների ուղեկցությամբ տոնի մասնակիցները կուղղվեն Ազատության հրապարակ: Ժամը 13:30-ին ձեր դիմակներով միացեք ուրախ շքերթին»,-ասաց Արարատյան հայրապետական թեմի տեղեկատվական բաժնի թեմական ծրագրերի համակարգող Հասմիկ Միրզոյանը:
Նա տեղեկացրեց, որ Ազատության հրապարակում տեղադրվելու է 5 հարթակ: Դրանցից մեկը նվիրված է լինելու Բուն Բարեկենդանի ծիսական դրվագներին:
Խոստումնալից է նաև հարթակներից մյուսը, որտեղ կներկայացվի «Քեֆ անողին քեֆ չի պակսիլ» ինտերակտիվ ներկայացումը, որի անունն անգամ հուշում է, որ դիտողները ևս իրենց փոքրիկ մասնակցությունը կունենան ներկայացմանը:
Հայկական քաղցրավենիքի սիրահարներին կհետաքրքրի հարթակներից երրորդը, որտեղ սիմվոլիկ գնով կվաճառվի Բուն Բարեկենդանի ուտեստը՝ Բխբխիկը:
«Բխբխիկը քաղցրավենիք է, որը բխբխկացնելու ենք յուղի մեջ: Լինելու են նաև այլ անուշեղեններ՝ հալվա, աղանձ և այլն: Ցուցահանդես-վաճառքի ամբողջ հասույթն ուղղվելու է բարեգործական նպատակների համար»,-պատմեց Հասմիկ Միրզոյանը:
Միջոցառման ընթացքում ներկաները ազգային խաղերին ծանոթանալու կամ դրանք վերհիշելու հնարավորություն կունենան: Տոնի կազմակերպիչները խոստանում են ամեն ինչ անել, որ անգամ եղանակային վատ պայմանները չխոչընդոտեն ուրախ տրամադրությունը:
Սովորաբար բարեկենդան է կոչվում շաբաթապահքերի ու Մեծ Պահքի նախընթաց օրը: Բարեկենդանին թույլատրվում են չափավոր վայելքներ, խրախճանքներ, խաղեր ու անուշեղեններ: Մեծ Պահքի բարեկենդանը կոչվում է Բուն Բարեկենդան:
Բարեկենդանը մարդու երջանկության հիշատակն է, որը վայելում էին Ադամն ու Եվան: Այն նաև դրախտային կյանքի օրինակն է, որտեղ մարդուն արտոնված էր ճաշակել բոլոր պտուղները, բացառությամբ բարու և չարի՝ գիտության ծառի պտղից:
Այս ընկալմամբ է, որ յուրաքանչյուր քրիստոնյա ապաշխարությամբ, պահքով ու ողորմության հույսով սկսում է Մեծ Պահքի 40-օրյա ճանապարհը: Այն տևում է 48 օր՝ Բուն Բարեկենդանից մինչև Սուրբ Հարության տոնը:
