ԵՐԵՎԱՆ, 6 փետրվարի — Sputnik. Վերահսկիչ պալատի և Հաշվեքննիչ պալատի հետ գործառույթները համեմատելու դեպքում կտեսնենք, որ նրանց նպատակները նույնն են՝ հանրային ֆինանսների և հանրային սեփականության արդյունավետ կառավարման տնօրինման խնդիրներ, ասաց ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը:
«Սակայն Սահմանադրությամբ մի էական փոփոխություն է կատարվել, որն էապես փոխելու է այսօրվա Վերահսկիչ պալատի գործունեության հնարավորությունները. Հաշվեքննիչ պալատը չափազանց անկախ է լինելու, քան այսօրվա Վերահսկիչ պալատը»,- ասաց Մինասյանը:
Ըստ հանձնաժողովի նախագահի՝ եթե Վերահսկիչ պալատի թիկունքում Ազգային ժողովն էր, ապա Հաշվեքննիչ պալատի թիկունքում օրենքն է լինելու:
Հաշվեքննիչ պալատի խորհրդի անդամների թեկնածություններն առաջադրելու է ԱԺ ֆինանսավարկային և բյուջետային հարցերի մշտական հանձնաժողովը, որի քվեարկությունն իրականացնելու է Ազգային ժողովը: Գագիկ Մինասյանի խոսքով՝ անդամների գործունեության ժամկետը 6 տարի է:
Վերահսկիչ պալատի վերաձևավորումն իրականացվելու է նոր սահմանադրության մեջ Վերահսկիչ պալատի մասին օրենքի փոփոխության արդյունքում:
