ԵՐԵՎԱՆ, 5 փետրվարի- Sputnik, Լաուրա Սարգսյան. Ռուսաստանի տարածքում հայկական դպրոցներ բացելու ուղղությամբ բանակցություններ են ընթանում, այդ մասին հայտարարվեց Sputnik Արմենիա միջազգային մամուլի կենտրոն կազմակերպված «Կրթության տարի ԱՊՀ-ում. հնարավորություններ երիտասարդ սերնդի համար» տեսակապի ժամանակ:
Ինչպես պարզաբանեց Հայաստանի կրթության նախարարության արտաքին կապերի և սփյուռքի վարչության պետ Տիգրան Սահակյանը, դպրոցներ կբացվեն հայաբնակ քաղաքներում՝ Մոսկվայում, Սանկտ Պետերբուրգում, Սոչիում և Կրասնոդարում:
«Այժմ մենք ռուսական կողմի հետ քննարկում ենք համագործակցության ձևաչափը. Կա՛մ պետք է դպրոցներ և դասսրաններ բացել, կա՛մ հայոց լեզվով մի քանի առարկաներ ներմուծել հանրակրթական դպրոցներում: Պետք է հասկանալ, թե ինչպես կգործի փորձնական ծրագիրը՝ հետագա համագործակցությունը պատկերացնելու համար»,- ասաց Սահակյանը Sputnik Արմենիային:
Նա նաև նշեց, որ ռուսաց լեզվի տեսանկյունից Հայաստանում իրավիճակը դրական է, չէ՞ որ այստեղ դպրոցներից բացի, որտեղ ռուսաց լեզու են դասավանդում, գործում են նաև ռուսալեզու բուհեր, օրինակ` Ռուս-hայկական (Սլավոնական) համալսարանը, Մոսկվայի պետական համալսարանի մասնաճյուղը:
«Մեզ մոտ մեծ փորձ է կուտակվել և ուրախությամբ ուզում ենք այն փոխանցել մեր գործընկերներին»,- ավելացրեց Սահակյանը՝ նշելով, որ Հայաստանում բարձրագույն կրթություն է ստանում ավելի քան 5 000 արտասահմանյան ուսանող՝ Ռուսաստանից, Մերձավոր Արևելքից, Իրանից, Հնդկաստանից:
Տեսակապի շրջանակում քննարկվեց նաև պետությունների համագործակցության ուժեղացման, կրթության ոլորտում համատեղ նախագծերի իրագործման, կրթության միասնական չափանիշների մշակման կարևորությունը, չէ՞ որ 2016թ.-ը ԱՊՀ երկրներում կրթության տարի է հայտարարվել:
Ինչպես նշեց ՌԴ կրթության և գիտության նախարարության միջազգային բաժնի տնօրեն Նիկոլայ Տայվոնենը, 2011-2015 թվականներին Ռուսաստանը շուրջ 2,9 մլրդ ռուբլի է տրամադրել ԱՊՀ երկրներում ռուսաց լեզվի զարգացման համար, իսկ 2016-2017թթ. նախատեսվել է երեք անգամ ավելի շատ գումար հատկացնել:
«Մենք ռուսալեզու դպրոցներ, ինստիտուտներ բացելու ուղղությամբ աշխատում ենք մի շարք երկրների հետ: Երկու տարի առաջ ՌԴ կառավարությունը քվոտան ավելացրել է արտասահմանյան այն քաղաքացիների համար, որոնք սովորում են երկրի տարածքում՝ 10 000-ից հասցնելով 15 000-ի»,- տեսակապի ժամանակ ասաց Տայվոնենը:
Փորձագետները նշեցին, որ կրթությունն այսօր դիտարկվում է ապագայի համար ներդրումներ կատարելու տեսանկյունից: Շեշտը դրվում է մասնագետների նախապատրաստման և ուսուցման վրա, որոնք, իրենց հերթին, կապահովեն երկրի ապագան: Միաժամանակ կրթության ոլորտում կարևոր է ինչպես միջազգային, այնպես ազգային փորձի համակցումը:
Բանավեճի արդյունքում Աստանայի, Երևանի, Մոսկվայի, Քիշնևի կողմերին առաջարկվեց այսօրինակ քննարկումները շարունակական դարձնել:
