ԵՐԵՎԱՆ, 5 փետրվարի — Sputnik. Երեխայի ուղեղի ողջ աշխատանքը մոլեկուլյար մակարդակով այն է, ինչ նա ուտում է։ Լավ առաջադիմություն ունեցող և առողջ երեխա ունենալու համար անհրաժեշտ է վերահսկել այս ոլորտը, ասում է դիետոլոգ Վարդանուշ Պետրոսյանը։
«Այն ծնողներն ու դպրոցները, որոնք ուզում են, որ իրենց երեխաների առաջադիմությունը բարձր լինի, օլիմպիադաներում հաղթանակ տանեն, պետք է հետևեն երեխայի սննդի որակին»,- վստահեցնում է դիետոլոգը։
Ըստ Վարդանուշ Պետրոսյանի` «ֆասթ ֆուդ» օգտագործող երեխաների մոտ ապագայում սրտանոթային հիվանդություններ առաջանալու վտանգը 70 տոկոսով ավելանում է։
«Եթե անգամ երեխաներն «արագ սնունդ» օգտագործեն երկու շաբաթը մեկ անգամ, նույնիսկ փոքր չափաբաժնով, միևնույն է` վնաս են հասցնում երեխայի առողջությանը»,- ասում է դիետոլոգը։
ԱՄՆ-ում հինգ տարի շարունակ անցկացված հետազոտությունները ցույց են տվել, որ ճիշտ և առողջ նախաճաշ անող երեխաների առաջադիմությունը մի քանի անգամ ավելի բարձր է։
Վարդանուշ Պետրոսյանը սննդամթերքի որոշակի ցանկ է մշակել երեխաների համար։ Նա տարիների փորձի հիման վրա մշակել և ստեղծել է «Ինգրեդիենտ» կոչվող հարթակը, որի առաջնահերթ նպատակների մեջ դպրոցականների սննդակարգի փոփոխությունն է։
«Մինչև հիմա աշխատել ենք մի քանի մանկապարտեզի հետ, բայց պատրաստ ենք մեծածավալ աշխատանք կատարել ցանկացած դպրոցի հետ։ Դա միայն ուտելիք խորհուրդ տալը չէ, այլ ամբողջական ճաշացանկ մշակելը, երեխաների հետ բացատրական աշխատանք տանելը, որովհետև մի օրում սիրելի «կոկա-կոլան» և պիցան վերացնելուց հետո երեխաների համար ֆիզիկապես և հոգեպես բարդ կլինի անցում կատարել օգտակար սննդի։
«Այսինքն մի քանի փուլով ծրագիր պետք է տանել թե՛ երեխաների, թե՛ ծնողների հետ»,- նշում է դիետոլոգը։
Վարդանուշ Պետրոսյանը հիշեցնում է բրիտանացի շեֆ խոհարար Ջեյմի Օլիվերի դպրոցական հեղափոխությունը, ինչի շնորհիվ ապացուցվել է, որ երեխաները կարող են սնվել և՛ համեղ, և՛ օգտակար։
Շեֆ խոհարար Ջեյմի Օլիվերը փոխել է Մեծ Բրիտանիայում դպրոցական սննդի համակարգը։ Նա սնունդ է տրամադրում 80 բրիտանական դպրոցի, որտեղ մեկ տարվա ընթացքում գերազանց սովորող աշակերտների թիվն ավելացել է 6 տոկոսով։ Օլիվերն այդ հարցին մոտեցել է ոչ միայն որպես խոհարար, այլ նաև որպես տեխնոլոգ և ապացուցել, որ կարելի է օգտակար սնունդ պատրաստել մրգերից և բանջարեղենից։
