ԵՐԵՎԱՆ, 5 փետրվարի- Sputnik. Հռոմի պապ Ֆրանցիսկոսն ու Մոսկվայի և Համայն Ռուսիո պատրիարք Կիրիլը փետրվարի 12-ին կհանդիպեն Կուբայում, ասվում է Վատիկանի և Մոսկվայի պատրիարքության հրապարակած համատեղ հայտարարությունում։
Հանդիպումը տեղի կունենա Կուբայի օդանավակայանում, որտեղ Հռոմի պապը կանգառ կունենա Մեքսիկա մեկնելու ճանապարհին։
Համատեղ հայտարարությունում նշվում է, որ դա «պատմական հանդիպում» կլինի։
«Դա կլինի առաջին հանդիպումը և կնշանավորի երկու եկեղեցիների հարաբերությունների նոր փուլը»,- ասվում է փաստաթղթի տեքստում։
Վոլոկոլամսկի միտրոպոլիտ Իլարիոնը Մոսկվայում հրավիրված մամուլի ասուլիսի ընթացքում պարզաբանել է, որ «հանդիպման ընթացքում նրանք առանձնազրույց կունենան Հավանայի միջազգային օդանավակայանում»։
Միտրոպոլիտ Իլարիոնը պարզաբանել է, որ դեռ 90-ական թթ.-ին նախատեսվել էր Մոսկվայի ու համայն Ռուսիո պատրիարք և Ալեքսի 2-րդի և Հովհաննես Պողոս 2-րդի հանդիպումը, սակայն այն տեղի չի ունեցել, քանի որ չի հաջողվել համաձայնեցնել այն հարցերը, որոնք էական նշանակություն ունեն Ռուսական ուղղափառ եկեղեցու դիրքորոշման համար։ Սակայն կողմերն առաջարկել են հանդիպում նախապատրաստել` նշելով, որ այն կարևոր է և հնարավոր։ Միաժամանակ ՌՈՒԵ արտաքին եկեղեցական կապերի բաժնի ղեկավարը նշել է, որ եկեղեցիների ղեկավարների համար կարևոր էր ոչ միայն ուղղակի հանդիպելն ու տեսախցիկների առաջ միմյանց ձեռք սեղմելը, այլև` իրական հարցեր լուծելը։ Արտաքին եկեղեցական կապերի բաժնի ղեկավարը պարզաբանել է, որ ավելի վաղ խոսքը եղել է այն մասին, որ Հռոմի պապը պետք է այցելի ոչ թե ՌԴ, այլ` չեզոք տարածք, իսկ Կուբան համապատասխանում է այդ պահանջին։
2014թ.-ի նոյեմբերին Ֆրանցիսկոսը Թուրքիա թռչող ինքնաթիռում լրագրողների հետ շփման ընթացքում ասել է, որ պատրաստ է ցանկացած ժամանակ հանդիպել պատրիարք Կիրիլի հետ։ 2014թ.-ի դեկտեմբերի 30-ին ՌԻԱ Նովոստիին տված հարցազրույցում Մոսկվայի պատրիարքության սինոդական տեղեկատվական բաժնի նախագահ Վլադիմիր Լեգոյդան հայտարարել էր, որ պատրիարք Կիրիլի ու Հռոմի պապի հանդիպումը կարող է կայանալ այն բանից հետո, երբ կլուծվեն Ուկրաինական հունական կաթոլիկ եկեղեցու գործողությունների հետ կապված հարցերը։ Ուկրաինական հունական կաթոլիկ եկեղեցին (ունիաթներ), որի հետնորդները հիմնականում ապրում են Ուկրաինայի արևմուտքում, պահպանում է ուղղափառ ծիսական կարգը, բայց իր ղեկավար է համարում Հռոմի պապին։
