ԵՐԵՎԱՆ, 5 փետրվարի — Sputnik. Գյումրիում Ավետիսյանների ընտանիքին սպանած Վալերի Պերմյակովի գործով արտագնա դատական նիստի ընթացքում ելույթ ունեցած վկան` սպա Միխայիլ Խաչատրյանը, հրաժարվեց պատասխանել իրեն ուղղված հարցերից մի քանիսին։
«Դա ծառայողական գաղտնիք է»,- ասաց Գյումրիում տեղակայված 2012 սահմանապահ ջոկատի սպա, Բայանդուրի սահմանապահ ուղեկալի հրամանատար Միխայիլ Խաչատրյանը, որը մասնակցել է Վալերի Պերմյակովի որոնողական աշխատանքներին և ձերբակալմանը։
«Եթե լիներ փակ դատ, դուք այդ հարցերին կպատասխանեի՞ք»,- հարցրեց հանրային պաշտպան Էդուարդ Աղաջանյանը։
«Փակ դատի դեպքում կխոսեի, եթե թույլ տան խոսել»,- պատասխանեց սպան։
Փետրվարի 5-ի արտագնա դատական նիստը չի ավարտվել։ Դատական նիստում դեռ խոսելու են սահմանապահները և Բայանդուր գյուղի բնակիչներից երկուսը`բոլոր նրանք, ովքեր կապ ունեն Պերմյակովի որոնողական աշխատանքների, ռուս զինծառայողի հայտնաբերման և ձերբակալման հետ։
Գյումրիում, որտեղ տեղակայված է 102-րդ ռուսական ռազմակայանը, 2015 թվականի հունվարի 12-ին սպանվել էր մի ամբողջ ընտանիք, մեկուկես տարեկան երեխան մահացել էր մեկ շաբաթ անց հիվանդանոցում։ Հանցագործության կասկածանքով նույն օրը ձերբակալվել էր ռուս պայմանագրային զինծառայող Վալերի Պերմյակովը: Նա փորձել էր անցնել Թուրքիայի տարածք, և ռուս սահմանապահները նրան հայտնաբերել էին հենց սահմանին: Զենք հափշտակելու և դասալքության համար 2015 թվականի օգոստոսի 12-ին Գյումրիում դատարանը Պերմյակովին դատապարտել է 10 տարի ազատազրկման։ Սպանության մասին գործը հանձնվել է հայկական կողմին և քննվում է առանձին, առաջին նիստը տեղի էր ունեցել դեկտեմբերի 18-ին։
