ԵՐԵՎԱՆ, 3 փետրվարի — Sputnik, Լաուրա Սարգսյան. Վրաստանի պետական ռազմական գիտատեխնիկական «Դելտա» կենտրոնը ռազմարդյունաբերական մշակումներ ունի, որոնք կարող են հետաքրքրել Հայաստանին։ Այս մասին Sputnik Արմենիայի թղթակցի հետ զրույցում ասաց ռազմական հարցերի փորձագետ Վախթանգ Մաիսայան։
Հայ-վրացական ռազմական համագործակցության ակտիվացման նոր խթան հանդիսացավ Հայաստանի և Վրաստանի` 2016 թվականին ռազմական համագործակցության մասին պայմանագիրը, որը ստորագրեցին երկու երկրի պաշտպանության նախարարները Վրաստանի պաշտպանության նախարար Թինաթին Խիդաշվիլիի հայաստանյան այցի ժամանակ։
Համագործակցության ծրագրի հիմնական դրույթներն են խաղաղապահության, ռազմական կրթության, պրոֆեսիոնալ պատրաստության և ռազմավարական նախագծման ոլորտներում համագործակցությունը:
«Վրաստանն ու Հայաստանը ռազմական ոլորտում շփման ընդհանուր շատ կետեր ունեն։ Օրինակ` խաղաղապահ գործողությունների մասնակցությունը` ոչ միայն տարածաշրջանում, այլև աշխարհում անվտանգություն ու կայունություն ապահովելու նպատակով, ահաբեկչության դեմ պայքարը»,- ասաց Մաիսայան։
Ռազմական փորձագետի խոսքով` Վրաստանը կարող է սեփական արտադրության ռազմական տեխնիկա առաջարկել Հայաստանին` զրահամեքենաներ, որոնք կարող են օգտագործվել բժշկական օգնության համար, ականորսիչներ և այլ տեխնիկա
Նախորդ ամսվա վերջին հայտնի դարձավ, որ «Դելտայի» պատրաստած զրահավոր փոխադրիչ մեքենան հաղթել է Սաուդյան Արաբիայի պաշտպանական գերատեսչության մրցույթում, և հունվարի 30-ին այնտեղ է ուղարկվել զրահամեքենաների առաջին խմբաքանակը։
Կենտրոնը, որը ստեղծվել է 2005 թվականին Վրաստանի նախագահի հրամանով, ներառում է մի շարք ձեռնարկություններ, այդ թվում` «Թբիլավիամշենին», որը վրացական ռազմարդյունաբերական համակարգերը զարգացնելու և արտադրելու ակտիվ գործունեությամբ է զբաղվում։
