ԵՐԵՎԱՆ, 3 փետրվարի – Sputnik. Արման Սաղաթելյանի` Հայաստանի հանրային ռադիոընկերության գործադիր տնօրեն նշանակվելու մասին որոշումը կայացվել է այսօր՝ փետրվարի 3-ին, Հանրային հեռուստառադիոընկերության խորհրդի նիստում՝ հիմք ընդունելով «Հայաստանի հանրային ռադիոընկերություն» փակ բաժնետիրական ընկերության գործադիր տնօրենի թափուր պաշտոնը զբաղեցնելու համար մրցույթի կազմակերպման և անցկացման ժամանակավոր հանձաժողովի 2016 թվականի փետրվարի 2-ի «Մրցույթի արդյունքում հաղթող ճանաչելու մասին» N2 որոշումը:
Արման Սաղաթելյանը ծնվել է 1975թ.-ի օգոստոսի 26-ին Երևանում: 1992 թվականին ավարտել է Երևանի Պուշկինի անվան թիվ 8 միջնակարգ դպրոցը, 1997 թվականին ավարտել է Հայկական գյուղատնտեսական ակադեմիան: 1997-2000 թվականներին սովորել է ՀՀ գիտությունների ազգային ակադեմիայի ասպիրանտուրայում։
1997-1999թթ.–ին ծառայել է ՀՀ զինված ուժերում՝ որպես «Զինուժ» հեռուստահաղորդման թղթակից և հաղորդավար։ 2000-2010թթ. աշխատել ՀՀ ՊՆ համակարգում՝ որպես քարոզչության և հասարակայնության հետ կապերի մասնագետ, «Զինուժ» հաղորդաշարի հաղորդավար։ ՀՀ ԶՈՒ պահեստազորի կապիտան է։
2010-2011թթ.–ին աշխատել է ՀՀ նախագահի աշխատակազմի «Հանրային կապերի և տեղեկատվության կենտրոն» ՊՈԱԿ-ի տնօրենի խորհրդական։ 2011-2012թթ. եղել է «ԱրմՌադիո FM 107» ռադիոկայանի տնօրեն, 2012-2013թթ.–ին`«ՊանԱրմենիան Մեդիա Գրուպ» ՓԲԸ-ի գլխավոր տնօրենի տեղակալ։
2011-2013 թվականներին ղեկավարել է Վ. Բրյուսովի անվան պետական լեզվահասարակագիտական համալսարանի Տեղեկատվության և հանրային հաղորդակցման տեխնոլոգիաների գիտաուսումնական կենտրոնը:
Քաղաքական գիտությունների թեկնածու է, մի շարք գիտական հոդվածների և ուսումնական ծրագրերի հեղինակ:
2013–2015թթ. աշխատել է ՀՀ նախագահի մամուլի քարտուղար:
Պարգևատրվել է «1992-1994թթ. մարտական գործողությունների մասնակից» կրծքանշանով, «Գարեգին Նժդեհ» մեդալով, անվանական զենքով:
