ԵՐԵՎԱՆ, 3 փետ — Sputnik. Նոր քաղաքաշինական ծրագրի իրականացումը երևանցիների վաղեմի երազանքն է, կարծում է Երևանի փոխքաղաքապետ Կամո Արեյանը:
ՀՀ ԱԺ-ում քննարկվում է Քաղաքային կայուն զարգացման երկրորդ վարկավորման ծրագիրը (Sustainable Urban Development Investment Program 2), որի արժեքը կազմում է 112 մլն 960 հազար դոլար։ Ծրագիրը պետք է ֆինանսավորի Ասիական բանկը:
«Վարկային ծրագիրը, որն այսօր ներկայացվեց ԱԺ-ում, թելադրված է Երևան քաղաքի հիմնական փաստաթղթի պահանջով` գլխավոր հատակագծով: Այս ծրագիրը հերթապահում էր տասնամյակներ շարունակ: Բարեբախտաբար և ուրախությամբ պետք է նշենք, որ ի վերջո իրականություն է դառնում քաղաքի և մեր բնակչության վաղեմի երազանքը», — ասեց Արեյանը:
Նրա խոսքով` սա լրջագույն ներդրում է քաղաքի ճանապարհաշինության ոլորտում` իր քաղաքաշինական արդյունավետությամբ, իր տնտեսական, սոցիալական բոլոր ազդեցություններով:
Արեյանը համամիտ չէ, որ ճանապարհների շինարարության հետ միասին քանդվում է նաև Երևանի կենտրոնը և անդրադարձավ մի քանի շաբաթ առաջ Արամի 30 հասցեում գտնվող հին շենքը քանդելու փաստին:
«Արամի 30 հասցեն ընդգրկված է եղել կառավարության կողմից 2007 թվականի 108 որոշման «Գերակա շահի ճանաչման» որոշման մեջ», — ասաց Արեյանը:
Նրա խոսքով` այդ վայրում նոր շինության կառուցում չի նախատեսվում, այլ Արամի 30 շենքի հաշվին լայնանալու են խաչմերուկային մայթերը:
Իսկ ինչ վերաբերում է ճարտարապետական շինություններին, հուշարձանների ցանկում ընդգրկված շինություններին, ըստ փոխքաղաքապետի, դրանք պահպանվում են օրենքի ուժով և քանդման ենթակա չեն:
«Ինչ վերաբերում է այն շենքերին, որոնք ենթակա են տեղափոխման, վերակառուցման, նաև այդ ցուցակում չեն, ապա այդ շենքերը քաղաքաշինական կառուցապատման խոշոր ծրագրերում, բնականաբար, պետք է ենթարկվեն վերակառուցման», — ասաց Արեյանը:
Քաղաքային կայուն զարգացման երկրորդ վարկավորման ծրագրի շրջանակում պետք է իրականացվեն լայն ճանապարհաշինարարական աշխատանքներ, որոնք կթեթևացնեն Երևանի ծանրաբեռնված երթևեկությունը։
