ԵՐԵՎԱՆ, 2 փետրվարի- Sputnik. Ձմեռային պատանեկան երկրորդ Օլիմպիական խաղերը կանցկացվեն Նորվեգիայի Լիլեհամեր քաղաքում, որն իր պատմության ընթացքում երկրորդ անգամ է հյուրընկալում օլիմպիադան, հաղորդվում է Հայաստանի ազգային օլիմպիական կոմիտեի կայքում:
1994 թվականին Լիլեհամերն ընդունել էր 15-րդ ձմեռային Օլիմպիական խաղերը: 2016 թվականի պատանեկան խաղերը հյուրընկալելու միակ հայտը ներկայացրել էր հենց Լիլեհամերը:
Լիլեհամերի ձմեռային խաղերին հանդես կգան գեղասահորդ Անաստասիա Գալուստյանը և դահուկորդ Միքայել Միքայելյանը:
Անաստասիա Գալստյանը վերջերս է վերադարձել Գեղասահքի Եվրոպայի առաջնությունից` զբաղեցնելով 15-րդ տեղը։
2011 դեկտեմբերի 7-ին պաշտոնապես հայտարարվեց, որ երկրորդ պատանեկան Խաղերը կանցկացվեն նորվեգական այս քաղաքում: Լիլեհամերը դարձավ երկրորդ քաղաքն Ինսբրուքից հետո, որը կընդունի թե՛ ձմեռային Օլիմպիական խաղերը և թե՛ պատանեկան Խաղերը: Լիլեհամերի պատանեկան Օլիմպիական խաղերի բացման պաշտոնական արարողության ժամանակ խաղերի կրակը կվառի Նորվեգիայի արքայադուստր Ինգրիդ Ալեքսանդրան, ինչպես իր հայրը՝ թագաժառանգ արքայազն Հաակոնը, 1994 թվականի Օլիմպիական խաղերի բացման ժամանակ:
Պատանեկան Օլիմպիական խաղերը կմեկնարկեն փետրվարի 12-ին և կեզրափակվեն փետրվարի 21-ին:
