ԵՐԵՎԱՆ, 2 փետրվարի — Sputnik. Սյունիքի մարզում փետրվարի 2-ի առավոտյան սկսված ուժեղ քամու հետևանքով ձյուն գոյացավ ավտոճանապարհներին, և մաքրման աշխատանքներ իրականացնելու արդյունքում փրկարարները Գորիս-Սիսիան ավտոճանապարհի տարբեր հատվածներից դուրս բերեցին շուրջ 100 տրանսպորտային միջոց և մոտ 350 քաղաքացու։
Ինչպես Sputnik ռադիոկայանին հայտնեց ՀՀ ՏԿԱԻՆ ճգնաժամային կառավարման ազգային կենտրոնի պետ, գնդապետ Հովհաննես Խանգելդյանը հայտնեց, որ Գորիս-Սիսիան ճանապարհն արդեն միակողմանի արդեն բաց է։
Այսօր փակ են Բերդ-Ճամբարակ, Ալագյազից Մելիքգյուղ տանող ավտոճանապարհները, ինչպես նաև Լոռու մարզի Կաթնաղբյուր —Ուրասար, Տաշիր-Պրիվոլնոյե, Ստեփանավան-Արմանիս ավտոճանապարհները և Հարթագյուղ-Խնկոյան-Լուսաղբյուր միջհամայնքային ավտոճանապարհը:
Առավոտից հանրապետության ողջ տարածքում թույլ ձյուն է տեղում, և նա հորդորեց քաղաքացիներին` ճանապարհ ընկելուց առաջ ծանոթանալ երթուղու եղանակային պայմաններին։ Բարձրադիր վայրերում կնկատվի մերկասառույցի երևույթ, այնպես որ պետք է երթևեկել միայն խիստ անհրաժեշտության դեպքում` ձմեռային անվադողերով։
Նա հայտնեց, որ կան գյուղեր, որտեղ ճանապարհը դժվարանցանելի է կամ փակ, բայց դրանք բացելու ուղղությամբ աշխատանքներ են տարվում։ Հիմնականում խնդիր կա բարձրլեռնային գոտիներում, իսկ ռազմավարական բոլոր ճանապարհները երթևեկելի են։ Արդեն բացվել է նաև Վարդենյաց լեռնանցքը։
Խանգելդյանը նշեց, որ երեք մարզերում` Սյունիքում` Սիսիան-Գորիս ճանապարհի 17-րդ կմ-ին, Արագածոտնի մարզի Ծիլքար համայնքի մոտակայքում և Գեղարքունիքի մարզի Սևան-Մարտունի ճանապարհին գործում են ԱԻՆ վրանային հենակետերը, որտեղ փրկարարներն իրականացնում են շուրջօրյա հերթապահություն, անհրաժեշտության դեպքում մարդիկ կարող են այնտեղ թեյ խմել ու անգամ գիշերել։
Ըստ Խահգելդյանի` ձյունն օրվա ընթացքում կդադարի, փետրվարի 3-6-ը կլինի ամպամած եղանակ, թեև առանձին վայրերում չի բացառվում անամպ երկինքը։ Ջերմաստիճանը բարձրադիր գոտինում կտատանվի գիշերը 10-14, ցերեկը` 0-5 աստիճան ցրտի սահմանում, իսկ ավելի ցածրադիր գոտիներում կդիտվի ցերեկը` 0-3, առանձին վայրերում` 2-5 աստիճան դրական ջերմաստիճան։ Մայրաքաղաքում վաղը կլինի 0-2 աստիճան տաքություն։
