ԵՐԵՎԱՆ, 2 փետրվարի — Sputnik. Հրշեջ-փրկարարները Շիրակամուտ գյուղից մոտ 5 կմ հեռավորության վրա հայտնաբերել են 13 հոգուց բաղկացած արշավախումբ՝ երիտասարդ աղջիկներ և տղաներ, բոլորը Երևանի բնակիչ, հայտնում է ՀՀ ՏԿԱԻՆ-ի մամուլի ծառայությունը:
Հունվարի 31-ի առավոտյան նրանք ուղևորվել էին Թռչկան` արշավի, իսկ վերադարձի ճանապարհին` արդեն ուժերը սպառած, թրջված և սառած, դժվարացել էին վերադառնալ:
Լոռու մարզային փրկարարական վարչության ՃԿԿ «911» ծառայությունը «Թռչկան» կոչվող վայր արշավի մեկնած խմբի անդամներից ահազանգ էր ստացել հունվարի 31-ին, ժամը 21:27-ի սահմաններում: Մմարտական հաշվարկը օգնության էր մեկնել ժամը 21:29-ին:
Հրշեջ-փրկարարներն արշավախմբին տեղափոխել են Սպիտակի հրշեջ-փրկարարական ջոկատ: Այնտեղ նրանց ցուցաբերել են անհրաժեշտ օգնություն` մերսելով սառած վերջույթները, հյուրասիրել, հնարավորություն տվել տաքանալ և վերականգնել ուժերը: Երբ խմբի անդամների ինքնազգացողությունը զգալի լավացել է, փրկարարները նրանց ճանապարհել են Երևան:
Արկածների սիրահար երիտասարդների ժամանցի յուրօրինակ ու ոչ այնքան անվտանգ այս տարբերակը կարող էր լրջորեն վտանգել նրանց առողջությունը, եթե նրանք ժամանակին չահազանգեին փրկարարներին, և վերջինները համապատասխան օգնություն չցուցաբերեին արշավականներին:
