Արման Վանեսքեհյան, Sputnik.
Հայաստանի նախկին վարչապետ Տիգրան Սարգսյանն այսօր ստանձնել է Եվրասիական տնտեսական հանձնաժողովի` Եվրասիական տնտեսական միության գործադիր մարմնի նախագահի պաշտոնը։ Մինչ այդ նա կատարում էր ԱՄՆ-ում Հայաստանի արտակարգ և լիազոր դեսպանի պարտականությունները։
Նրան այդ բարձր պաշտոնում նշանակելու մասին որոշումն ընդունվել էր 2015թ.-ի դեկտեմբերին Եվրասիական տնտեսական խորհրդի նիստի ժամանակ։
ԱԺ Ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը համոզված է, որ նախկին վարչապետի փորձը և գիտելիքներն անպայման դրական կանդրադառնան ԵՏՄ-ի կառուցվածքում այդ կարևորագույն օղակի աշխատանքի արդյունքների վրա։
«Չեմ սխալվի, եթե ասեմ, որ նոր, դեռ կայացման փուլ անցնող Եվրասիական միության համակարգերը հիմա նույնիսկ ավելի կարևոր են, քան քաղաքական ասպեկտը։ Եվ այն հանգամանքը, որ հենց այդ օղակն է ղեկավարելու մեր նախկին վարչապետը, շատ բանի մասին է խոսում։ Մասնավորապես այն մասին, թե որքան կարևոր է հենց Հայաստանը ԵՏՄ-ում»,- ասաց Մինասյանը։
Իհարկե, հասկանալի է, որ Տիգրան Սարգսյանի նոր պաշտոնը չափազանց պատասխանատու է։ Այն առաջադրանքները, որոնք նա կկատարի այս նոր պաշտոնում, կվերաբերեն ոչ միայն հայկական խնդիրներին։ Գործունեության դաշտն ավելի լայն է։ Առաջին տեղում տնտեսական կապերն են, դրանց արդյունավետությունը հենց ԵՏՄ-ում։ Մյուս կողմից, պետք է հաշվի առնել նաև այն հանգամանքը, որ Սարգսյանը հիանալի տեղյակ է Հայաստանի տնտեսական իրավիճակից։
«Դա նշանակում է, որ ինչ-որ կոնկրետ հարցեր կլուծվեն ավելի արդյունավետ և որ պակաս կարևոր չէ` ավելի արագ»,- կարծում է խորհրդարանական հանձնաժողովի նախագահը։
Բացի այդ, պետք է հաշի առնել նաև այն հանգամանքը, որ Եվրասիական տնտեսական հանձնաժողովի կառուցվածքում կա նաև տեղեկատվության, տեղեկատվա-հաղորդակցական տեխնոլոգիաների գծով խորհրդի անդամի (նախարար) պաշտոն, որը զբաղեցրել է Կարինե Մինասյանը` Հայաստանի էկոնոմիկայի նախկին փոխնախարարը։
ԵՏՄ տնտեսական կառուցվածքում ոլորտը բավական կարևոր է, որից շատ բան կախված կլինի հենց տնտեսական փոխհարաբերությունների առումով։
Սակայն, ինչպես կարծում է խորհրդարանականը, բանը բոլորովին այն չէ, որ լինելով Հայաստանի քաղաքացիներ` Սարգսյանը և Մինասյանը ԵՏՄ տնտեսական կառույցներում առաջ կմղեն մեր երկրի շահերը։ Բոլորովին ոչ։
Այդ կառույցում աշխատանքն ի սկզբանե ուղղված է նրան, որպեսզի ողջ համատեղ տնտեսական մեխանիզմը լավ աշխատի, և միայն այդ ժամանակ ԵՏՄ-ն կապացուցի իր կենսունակությունը։ Եվ հենց այդ ուղղությամբ են ջանքեր գործադրելու հայ տնտեսագետները։
Միաժամանակ նրանք հիանալի տիրապետում են Հայաստանի տնտեսության յուրահատկությանը և խնդիրներին։ Եվ այդ առումով, իհարկե, հույս կա, որ կառույցում շատ հարցեր ավելի արագ ու արդյունավետ կլուծվեն։
