ԵՐԵՎԱՆ, 1 փետրվարի- Sputnik. Առողջապահական պետական տեսչության աշխատակիցները դպրոցներում դասղեկների հետ ընդունել են երեխաներին, նշել է Երևանի քաղաքապետարանի աշխատակազմի հանրակրթության վարչության պետ Գայանե Սողոմոնյանը
«Եթե նկատել են հիվանդության ախտանիշներով աշակերտներ, նրանց տուն են ուղարկել, նույն աշխատանքը տարվել է ուսուցիչների հետ։ Եղել են դեպքեր, երբ ուսուցիչներին են տուն ուղարկել»,- նշել է Սողոմոնյանը։
Դպրոցներում ջեռուցման համակարգերը չեն անջատվել, դրանք գործել են ցածր ռեժիմով, ուրբաթ օրվանից քաղաքապետ Տարոն Մարգարյանի հանձնարարությամբ կաթսայատան պատասխանատու աշխատակիցները բարձրացրել են ջերմաստիճանը, որպեսզի երկու օրվա ընթացքում դասասենյակներում ապահովվի անհրաժեշտ ջերմաստիճան։ Սակայն Սողոմոնյանի խոսքով` փետրվարի 1-ին հաճախումների տոկոսը ցածր է եղել։
Ուսումնական գործընթացի պարտադիր ծրագիրը կատարելու համար նախարարությունը հանձնարարել է շաբաթվա օրերի մեջ մեկ ժամ ավելացնելով լրացնել բաց թողնված դասերը։ Ծնողների հետ եղել են հանդիպումներ, նրանց հետ քննարկվել է այս հարցը։
Վարչության պետը նշել է, որ միայն երեք հերթով աշխատող դպրոցները ժամանակի երկար տևողության պատճառով կաշխատեն շաբաթ օրը, իսկ դպրոցների հիմնական մասը կգործի հինգ օր` յուրաքանչյուր օր մեկ ժամ ավելացնելով։
Հիշեցնենք, որ սուր վարակիչ հիվանդությունների ակտիվացման պատճառով Առողջապահության նախարար Արմեն Մուրադյանի առաջարկով դպրոցական արձակուրդը երկարաձգվել էր 3 շաբաթով։ Հայաստանը հայտնվել էր համաճարակի եզրին. դեպքերի 80 տոկոսը 0-18 տարեկան երեխաների մոտ էին գրանցվել։
