ԵՐԵՎԱՆ, 1 փետրվարի — Sputnik. ԵՏՀ նախագահի պաշտոնը ստանձնած Տիգրան Սարգսյանն իր կարողությունները կծառայեցնի ԵՏՄ զարգացմանը, կարծում է ԱԺ Ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը։
«ԵՏՄ-ն ունի խնդիրներ, որոնց հաջող լուծումը որոշ չափով պայմանավորված է նաև Տիգրան Սարգսյանի աշխատանքից։ Ես համոզված եմ, որ նա իր կարողությունները լավագույնս կդրսևորի։ Ով որքանով դա կօգնի ԵՏՄ զարգացմանը, այնքան էլ օգտակար կլինի միության անդամ երկրներին, այդ թվում` Հայաստանին»,- ասել է Մինասյանը։
Հանձնաժողովի նախագահը նշել է, որ Հայաստանը օրենքներն է լրամշակում, փորձում է նոր գործընկերներ գտնել, խրախուսում է արտահանումը, և Տիգրան Սարգսյանը քաջատեղյակ է ամեն ինչից։
«Տիգրան Սարգսյանը` որպես տնտեսագետ և կազմակերպիչ, կկարողանա իր հնարավորությունները օգտագործել ԵՏՄ-ի համար։ Վստահ եմ, որ նա այդ կառույցի ներսում կխրախուսի Հայաստանի և մյուս պետությունների համագործակցության խորացումը»,- նշել է Մինասյանը։
Փետրվարի 1-ից Հայաստանի նախկին վարչապետ Տիգրան Սարգսյանն անցել է Եվրասիական տնտեսական հանձնաժողովի նախագահի պարտականությունների կատարմանը։ Սարգսյանի թեկնածությունն այդ պաշտոնում հաստատվել էր 2015թ.-ի դեկտեմբերին Եվրասիական բարձրագույն տնտեսական խորհրդի նիստում ԵՏՄ նախագահների կողմից։ Սարգսյանը փոխարինել է ՌԴ ներկայացուցիչ Վիկտոր Խրիստենկոյին։
