ԵՐԵՎԱՆ, 1 փետրվարի- Sputnik, Դավիթ Գալստյան. Չնայած Իրանի հետ բարեկամական հարաբերություններին` Հայաստանում այդ երկրի մասին շատ քիչ բան գիտեն, Sputnik Արմենիա պորտալին ասաց ՀՀ ԱԺ տնտեսական հարցերի հանձնաժողովի նախագահ Միքայել Մելքումյանը։
«Իրանը բարեկամ երկիր է մեզ համար, բայց մենք այն վատ գիտենք։ Այդ առումով երկու երկրի խորհրդարանական հարաբերություններն արմատական վերանայման կարիք ունեն»,- կարծում է նա։
Մելքումյանը շոշափեց նման քայլերի անհրաժեշտությունը` մեկնաբանելով ԻԻՀ-ում ձեռք բերած համաձայնությունը` Հնդկաստանից Սև ծով տրանսպորտային միջանցքի մասին։ Տրանսպորտային միջանցքն ընդգրկելու է Իրանի, Հայաստանի և Վրաստանի տարածքները։
Այդ համաձայնությունը ձեռք է բերվել հունվարի 30-ին Հայաստանի տրանսպորտի և կապի նախարար Գագիկ Բեգլարյանի` Իրան կատարած այցի ընթացքում։ Նրա խոսքով` Երևանի հաշվարկել է, որ այդ ուղին ավելի էժան կլինի, քան այն ճանապարհները, որոնք անցնում են Ադրբեջանի և Թուրքիայի տարածքներով։
«Ես դրական եմ գնահատում ցանկացած ենթակառուցվածքային նախագիծ, ոչ միայն սա, այլ նաև Մետաքսե ճանապարհի գոտին, Իրան-Հայաստան երկաթուղին և այլն։ Բայց պետք է իրատես լինել, հաշվի առնել, թե ինչպես են Չինաստանը, Հնդկաստանը, Իրանը վերաբերվում Հայաստանի ենթակառուցվածքին, քանի որ կան նաև այլ ճանապարհներ»,- ասաց Մելքումյանը։
Նրա խոսքով` Հայաստանի արտաքին տնտեսական քաղաքականությունը, այդ թվում` Իրանի նկատմամբ, պետք է ուղղված լինի նրան, որպեսզի ներկայացնի իր գրավչությունը և դառնա տարանցիկ երկիր։
«Դրա համար հիմք կհանդիսանա այդ երկրներին ընդունելի պայմաններ տրամադրելը` որպես տրանսպորտային միջանցք օգտագործելու համար»,- ասաց Մելքումյանը։
Տրանսպորտային միջանցքին մասնակցելուց բացի, Երևանը և Թեհրանը նախատեսում են իրականացնել մի շարք նախագծեր, մասնավորապես էներգետիկայի ոլորտում։ Դրանց շարքում են Արաքս գետի վրա հիդրոկասկադի շինարարությունը և Հայաստանի ու Իրանի միջև 400կՎտ հզորությամբ էլեկտրահաղորդումների երրորդ գծի շինարարությունը։
