Լաուրա Սարգսյան, Sputnik.
Հայաստանի և Վրաստանի պաշտպանական գերատեսչությունների միջև 2016թ.-ի երկկողմ համագործակցության մասին պայմանագրի ստորագրումը համագործակցության նոր փուլ դարձավ։
2010թ. ի վեր պլանային հիմունքներով իրականացվող երկկողմ ռազմական համագործակցության ամենամյա ծրագրի այս տարվա հիմնական ուղենիշներն են փորձի փոխանակումը խաղաղապահության, ռազմական կրթության, մասնագիտական վերապատրաստման և ռազմավարական պլանավորման ոլորտներում:
Հարգանքի դրսևորում
Վրաստանի հարցերով փորձագետ, Պետական կառավարման ակադեմիայի տարածաշրջանային հետազոտությունների կենտրոնի գիտաշխատող Ջոնի Մելիքյանը կարծում է, որ վրացական պաշտպանական գերատեսչության ղեկավարի այցը Հայաստան հարգանքի դրսևորում է։
Միաժամանակ նա ուշադրություն է հրավիրում այն փաստի վրա, որ Խիդաշելին Հայաստան է ժամանել ՆԱՏՕ-ի երկրների ԱԳ նախարարների հանդիպումից և Թուրքիայի, Վրաստանի ու Ադրբեջանի պաշտպանության նախարարների հետ ունեցած հանդիպումից հետո, որը կայացել է նրանց համագործակցության եռակողմ ձևաչափի շրջանակում։ Դրանով Թբիլիսին ցանկանում է ցույց տալ, որ կա նաև Հայաստանի հետ համագործակցության ձևաչափ, որը, չնայած սահմանափակումներին, խորանալու հնարավորություններ ունի։
Նա այցելել է երկիր, որը մեծ սփյուռք ունի Վրաստանում, և այդ քաղաքացիները քվեարկելու են այս տարի կայանալիք խորհրդարանական ընտրություններում։ Խիդաշելիի այցի ու հանդիպումների հիման վրա կարելի է հետևություն անել, որ հարցերը չեն սահմանափակվում միայն պաշտպանական ոլորտով, այլ նախատեսում են նաև քաղաքական ասպեկտներ։
«Ես այցը կապում եմ գալիք խորհրդարանական ընտրությունների հետ, որոնց ժամանակ «Վրացական երազանք» կոալիցիան, որի ներկայացուցիչ է Խիդաշելին, ցանկանում է Վրաստանում բնակվող հայերի աջակցությունը ստանալ։ Եվ այդ այցը պետք է ցույց տար, որ Հայաստանի հետ փոխհարաբերությունները վատ մակարդակում չեն և որոշակի զարգացում են ապրում»,- կարծում է Մելիքյանը։
Երևանյան հանդիպումը համաձայնեցվել է Գերմանիայում
Այն մասին, որ Վրաստանի պաշտպանության նախարար Թինաթին Խիդաշելին պաշտոնական այցով կժամանի Երևան, հայտարարվել է Գերմանիայում 2015թ.-ի նոյեմբերին։ Այդ ժամանակ Վրաստանի նախարարի այցի հարցը քննարկել էին Հայաստանի ՊՆ ղեկավար Սեյրան Օհանյանը և Վրաստանի ԶՈՒ գլխավոր շտաբի պետ Վախթանգ Կապանաձեն` ՆԱՏՕ-ի հովանու ներքո Աֆղանստանում «Վճռական աջակցություն» խաղաղապահ առաքելության անդամ երկրների պաշտպանության նախարարների հանդիպումների շրջանակում։
Խիդաշելիի և Օհանյանի հանդիպումն առաջինը չէր։ Նրանք հանդիպել են Բրյուսելում ՆԱՏՕ-ի երկրների արտգործնախարարների հանդիպման ժամանակ, որը կայացել էր 2015թ.-ի հունիսի 24-25-ին։ Ավելի ուշ հայկական պատվիրակությունը պաշտպանության փոխնախարար Դավիթ Տոնոյանի գլխավորությամբ մեկնել էր Վրաստան։
Հայ-վրացական փոխազդեցությունը` ՆԱՏՕ-ի սևեռուն ուշադրության տակ
Բրյուսելում,Վրաստանում և Հայաստանում երկկողմ հանդիպումների ժամանակ որպես գերակա ուղղություն է առանձնացվել ՊՆ ուսումնական հաստատությունների համագործակցությունը։
Հայկական կողմն առաջարկել է, որ վրացի զինծառայողները, որոնք վիրավորվել են ՆԱՏՕ-ի և Եվրամիության հովանու ներքո անցկացվող տարբեր խաղաղապահ գործողությունների ժամանակ, բուժում անցնեն հայկական կենտրոններում։
Հայաստանի և Վրաստանի միջև ռազմական համագործակցությունը մեծամասամբ իրականանում է ՆԱՏՕ-ի ծրագրերի շրջանակում։
Հիշենք «Agile Spirit 2015» բազմազգ զորավարժությունները, որոնք մեկնարկել են հուլիսի 8-ին Վազիանի ռազմակայանում (Թբիլիսիի մոտ) Վրաստան-ՆԱՏՕ փաթեթի շրջանակում։ Դրանց հայկական կողմը մասնակցել է որպես դիտորդ։
Հայ զինվորականները պարբերաբար ՆԱՏՕ-ի անդամ երկրների ու գործընկերների ներկայացուցիչների հետ անցնում են Սաչխերի լեռնային նախապատրաստման դպրոցի ամառային ու ձմեռային դասընթացները` ՆԱՏՕ-ի «Գործընկերություն հանուն խաղաղության» ծրագրի շրջանակում։
Վրացի տեսուչների ղեկավարությամբ մասնակիցներն ուսումնասիրում են լեռնային և սառցակալած տեղանքներում տեղաշարժվելու մեթոդները, հաղթահարում տարբեր արգելքներ։
