ԵՐԵՎԱՆ, 31 հունվարի, — Sputnik. Ռուսաստան ու ԵՏՄ մյուս երկրների շուկաներ արտահանվող հայկական մթերի տեսականին պետք է ընդլայնել, նշեց Ագրարագյուղացիական միավորման նախագահ Հրաչ Բերբերյանը։
Նրա խոսքով` ամեն տարի հայկական գյուղմթերքն արտահանվել է Ռուսաստան և Վրաստան, սակայն այս տարի, կապված ՌԴ թուրքական ապրանքի արգելքի հետ, ռազմավարական ծրագիր է մշակվել, պայմանավորվածություն կա տեղափոխումն ապահովող լոգիստիկ ընկերության հետ, որպեսզի վաղ գարնանից սկսվի գործընթացը։
«Հայաստանն իր մշակվող հողատարածքներով չի կարող մրցել Թուրքիայի հետ, եթե Թուրքիայում դեկտեմբերին առանց ջեռուցման կարող են լոլիկ արտադրել, մենք դա չենք կարող, որովհետև ջեռուցման ծախսեր ունենք, իսկ գինը կարևոր նշանակություն ունի»,- ընդգծեց Բերբերյանը։
Նա հայտնեց, որ արտահանվող գյուղմթերքի ավանդական տեսականին կպահպանվի, սակայն կլինեն շուկայի պահանջից բխող որոշ փոփոխություններ։
«Խաղողի վերամշակման ոլորտում կան խնդիրներ։ Հայաստանից հիմնականում կոնյակ ու գինի է արտահանվում, որոնք հիմա ռուսական շուկայում քիչ պահանջարկ ունեն, ու մենք տեսականին կարող ենք փոխել, օրինակ` խաղողի օղի արտահանել»,- կարծիք հայտնեց նա։
Գյուղատնտեսության ոլորտն ավելի արդյունավետ դարձելու համատեքստում Բերբերյանը նշեց, որ նախ` պետք է մեծացնել ոռոգելի հողատարծքները, երկրորդ` մշակվող հողատարծքներում բարձրացնել բերքատվությունը, այսինքն` վարել ինտենսիվ գյուղատնտեսություն։
