Դավիթ Գալստյան, Sputnik.
27-ամյա հայ գրոսմեյստեր Զավեն Անդրիասյանը վերջերս Հայաստանի շախմատի 76-րդ առաջնության հաղթող դարձավ:
Sputnik Արմենիա պորտալը զրուցեց չեմպիոնի հետ այն մասին, թե ինչպես է նա ապրում «խաղից դուրս»: Ինչպես խոստովանում է շախմատիստը, կյանքում ինքը հույսը միայն իր վրա է դնում, դրա համար էլ ընտրել է սպորտի այս անհատական ձևը։
«Ես ընտրել եմ շախմատը, քանի որ այն անհատական մարզաձև է: Ես շատ եմ սիրում նաև ֆուտբոլը, սակայն ֆուտբոլն, ի տարբերություն շախմատի, թիմային խաղ է, սակայն ես ուրիշների հետ հույս չեմ կապում», — ասում է Անդրիասյանը:
Շախմատիստը բավական գործնական մոտեցում ունի կյանքին: Խոստովանում է, որ երազանքներով չի ապրում:
«Ես իմ առջև փոքր նպատակներ եմ դնում և փորձում եմ հասնել դրանց: Երբեք չեմ ափսոսում այն բանի համար, ինչ արել կամ չեմ արել: Կյանքը շարունակվում է, ես ուրախ եմ, որ շախմատում որոշակի հաղթանակների եմ հասել», — նշեց շախմատիստը։
Որպես մարզիկ` նա ցանկանում է բարձրացնել իր վարկանիշը, իսկ թիմի կազմում օգնել հասնելու համատեղ հաղթանակի: Առօրյայում, ինչպես և կյանքում, Զավենը բավականին հավասարակշռված մարդ է:
«Սովորաբար ես շատ հանգիստ եմ: Աշխատում եմ չնյարդայնանալ ու չբարկանալ», — ասում է նա:
Նա խոստովանում է, որ շատ քիչ ազատ ժամանակ է ունենում:
«Շատ քիչ ժամանակ է մնում, իսկ եթե լինում է, փորձում եմ անցկացնել այն ընկերներիս հետ: Երբեմն տանը ֆիլմեր եմ դիտում: Երբեմն գրքեր եմ կարդում», — ասում է շախմատիստը:
Շախմատիստը կուռքեր չունի, սակայն որպես մարզիկ` հարգում է Զինեդին Զիդանին: Իսկ ինչ վերաբերում է ապագայի պլաններին, ապա դրանք էլ բավական պարզ ու հասկանալի են: Անդրիասյանը ցանկանում է ընտանիք կազմել ու արժանի կերպով դաստիարակել իր երեխաներին` հավատարիմ մնալով իր երկրին:
Զավեն Անդրիասյանը միջազգային առաջնությունների բազմակի հաղթող է. 2006 թվականին երիտասարդների աշխարհի առաջնության չեմպիոն: 2006 թվականին մինչև 18 տարեկանների Եվրոպայի փոխչեմպիոն: 2010 թվականին արժանացել է Ռուսաստանի գավաթին և հիմնական ժամանակում հաղթել բոլոր նոկաուտ-առաջնությունների խաղերը. նման բան չի եղել երկրի Գավաթի պատմության մեջ:
