ԵՐԵՎԱՆ, 29 հունվարի — Sputnik. Հայաստանի հանրապետական կուսակցության գործադիր մարմնի հերթական նիստում նախարարական պորտֆելների բաշխման հարց չի դրվել, հայտնեց ՀՀ ԱԺ փոխխոսնակ Էդուարդ Շարմազանովը:
«Մամուլը բաշխում է, մամուլը նշանակում է, ազատում է, դա մամուլի խնդիրն է: Ես չեմ պատրաստվում մամուլով հրապարակվող բոլոր հոդվածներին անդրադառնալ, քանի որ նրանք այնքան բազմազան են և բազմաժանր, որ դժվար է պատասխանել»,- ասաց Շարմազանովը:
Ըստ փոխխոսնակի՝ ԶԼՄ-ներն են, որ պորտֆելներ են բաժանում և հեռացնում պաշտոններից, իսկ ՀՀԿ-ՀՅԴ բանակցությունները շարունակվում են:
«Դաշնակցության հետ դեռևս քննարկվում է համագործակցության ձևաչափը, գուցե հաջորդ նիստի ընթացքում կամ դրանից հետո նոր զարգացումների մասին կխոսեմ, այս պահին վերջնական որևէ բան հստակեցված չէ, կապրենք կտեսնենք»,- ասաց փոխխոսնակը:
Օմբուսմենի թեկնածուի հարցը դեռ չի լուծվել: Նրա խոսքով՝ դեռ ժամանակ կա: Առավել ևս, որ այդ հարցը նախ պետք է քննարկվի խորհրդարանում:
Էդուարդ Շարմազանովը տեղեկացրեց նաև, որ նիստի ընթացքում անդրադարձ է եղել ԵԽԽՎ-ում քվեարկության դրված հակահայկական զեկույցներին՝ նշելով, որ հայկական կողմը մանրակրկիտ աշխատանք է կատարել քննարկմանը մասնակցելու համար, և ընդհանուր առմամբ դա կարելի է հայկական դիվանագիտության հաջողություն համարել:
«Մենք պետք է համախմբված աշխատենք, քանի որ անկախ ամեն ինչից, կան երկրներ, որոնք միշտ քվեարկել են ու շարունակելու են քվեարկել Հայաստանի դեմ»,- հայտարարեց Շարմազանովը:
