ԵՐԵՎԱՆ, 29 հունվարի — Sputnik. 1963 թվականին Մեծ Բրիտանիայում իրականացված «գնացքի մեծագույն կողոպուտի» վերջին ողջ մնացած մասնակիցը` Դուգլաս Գորդոն Գուդին, մահացել է Իսպանիայում։
1975 թվականին բրիտանական բանտից դուրս գալուց հետո Գուդին Իսպանիայում ապրել է շուրջ 40 տարի։ Հայտնի հանցագործը մահացել է Մոհաքար քաղաքում, հայտնել են տեղի իշխանությունները։ Գուդին «դարի կողոպուտի» միակ ողջ մնացած մասնակիցն էր։
Գլազգո-Լոնդոն երթուղով մեկնող գնացքի կողոպուտն իրականացվել է 1963 թվականի օգոստոսին։ 15 հոգուց բաղկացած հանցախումբը, որը գլխավորում էր հնաոճ իրերի խանութի սեփականատեր Բրյուս Ռեյնոլդսը, հարձակվել էր փոստային ծառայության գնացքի վրա, որը Շոտլանդիայից Լոնդոն էր տեղափոխում շրջանառությունից հանված հին թղթադրամները` դրանք ոչնչացնելու համար։
Դուգլաս Գուդին Ռեյնոլդսի վաղեմի ընկերներից էր ու հանցագործության «ուղեղը»։ Հանցախումբը հարձակվել էր գնացքի վրա և 2.6 մլն ֆունտ էին գողացել։
Գողացված դրամի մեծ մասն այդպես էլ չի հայտնաբերվել, թեև կողոպուտից մի քանի ամիս հետո հայտնաբերվել էին այդ աղմկահարույց հանցագործության հանցախմբի գրեթե բոլոր անդամները, որոնցից ոմանք հետագայում կարողացել էին փախչել բանտից։
Գործը վարող դատավորը փոստային գնացքի կողոպուտն անվանել էր «շահադիտական բռնի հանցագործություն, որի ոգեշնչման աղբյուր էր դարձել «ագահությունը»։
1964 թվականին դատարանի առջև կանգած 11 անձանցից 7-ը, այդ թվում` Գուդին, դատապարտվեցին 30 տարվա ազատազրկման, մյուսները բանտ տեղափոխվեցին 3-24 տարով։ Սակայն արդեն 1975 թվականին Գուդիին վաղաժամ ազատ էին արձակել։ Եվս չորս տարի անց նա մեկնել էր Իսպանիա, որտեղ և անցկացրել էր կյանքի վերջին տարիները։
