ԵՐԵՎԱՆ, 29 հունվարի — Sputnik. Այն, որ Իսրայելի ՊՆ-ն Թուրքիային մեղադրում է «Իսլամական պետությունից» նավթ գնելու մեջ, ցուցադրական բնույթ է կրում, կարծում է թուրքագետ Մուշեղ Խուդավերդյանը։
Ավելի վաղ Իսրայելի պաշտպանության նախարար Մոշե Յաալոնը հայտարարել էր, որ ԻՊ-ի գրոհայինները ֆինանսավորվում են Թուրքիայի կողմից։ Հունաստանի պաշտպանության նախարար Փանոս Կամենոսը, ով Աթենքում երեքշաբթի հանդիպում է ունեցել Յաալոնի հետ, նույնպես հայտարարել է, որ ԻՊ-ն մաքսանենգ ճանապարհով ձեռք բերած նավթի մեծ մասը վաճառում է Թուրքիային։
«Իսրայելացի նախարարի հայտարարությունը կարելի է անակնկալ համարել թուրքական իշխանության համար, չնայած Էրդողանն էլ վերջերս Իսրայելի հասցեին քննադատությամբ հանդես եկավ։ Մյուս կողմից` անհրաժեշտ է հիշել, որ երկու երկրներն էլ կից են արևմտյան դաշինքին ու շատ դեպքերում հանդես են գալիս, որպես դաշնակիցներ», — ասաց Խուդավերդյանը։
Թուրքագետի կարծիքով` Իսրայելի դեմ հանդես եկող իսլամական աշխարհը բաժանելու համար թուրք-իսրայելական խաղ է գնում, որն ուղղված է արտաքին լսարանին։ Նպատակն այն է, որ ցույց տան, թե Թուրքիան ու Իսրայելը հակառակորդներ են։
«Սակայն պետք է հիշել, որ երկու երկիրն էլ ԱՄՆ-ի հավատարիմ դաշնակիցներն են։ Միանշանակ կարելի է ասել, որ նման հայտարարությունների նպատակը միջազգային հանրությանը խաբելն է», — կարծում է թուրքագետը։
Նա կարծում է, որ Իսրայելը մինչև վերջերս ցանկանում էր, որ Թուրքիան իսլամական աշխարհում առաջատար դիրք զբաղեցներ, և նրա օգնությամբ մյուս իսլամական երկրներն ավելի քիչ վերահսկելի դառնային։ Սակայն Թուրքիան ձախողեց այդ ծրագիրը, այդ դերը ստանձնեցին և Իրանն ու Սաուդյան Արաբիան։
Խուդավերդյանի խոսքով` նույն Թուրքիան այժմ բավական բարդ վիճակում է գտնվում։
Թուրքիայի նկատմամբ կիրառված ռուսական տնտեսական պատժամիջոցներին լրացնում են Ռուսաստանի հաջող գործողությունները Սիրիայում։ Թուրքագետի խոսքով` Ռուսաստանի կողմից С-300 և С-400 համակարգերի տեղակայման միջոցով նվազագույնի են հասցրել Թուրքիայի ազդեցությունը Սիրիայում, բացի այդ աճում է ՌԴ-ի ազդեցությունը Սիրիայի քրդերի շրջանում։
«Թուրքիայում շարունակում է աճել լարվածությունը։ Թուրքական գլխավոր շտաբի տվյալների համաձայն` միայն հունվարին Թուրքիայում սպանվել է 15 զինվոր։ Սա նշանակում է, որ Քրդստանի աշխատավոր կուսակցությունը թուրք ուժայինների դեմ պարտիզանական պատերազմ է վարում, ինչն ավելի է դժվարացնում իրավիճակը պաշտոնական իշխանության համար», — ասաց Խուդավերդյանը։
Նրա խոսքով` ՔԱԿ-ն առաջիկայում չի պատրաստվում զիջումների գնալ Թուրքիայի իշխանության հանդեպ, ինչի մասին հայտարարում են նաև քրդական կուսակցության առաջնորդները։
