ԵՐԵՎԱՆ, 29 հունվարի — Sputnik. Շվեյցարահայ Սասուն Սիրմակեսը հիմնադրեց Cvstos ապրանքանիշը, որն արդեն մի քանի տարի է` մեծ ճանաչում է վայելում աշխարհում։
«Թիկ-թակ` սա երևի երկրորդ բառն է, որը ես սովորել եմ մանուկ հասակում։ Որքան ինձ հիշում եմ, ինձ միշտ հետաքրքրել է ժամացույցի կառուցման տեխնոլոգիան։ Ինձ դուր էր գալիս հետևել հորս աշխատանքին, նրանից սովորել այդ արհեստի հիմունքներն ու փորձ ձեռք բերել», — հիշում է 33-ամյա գործարարը ։
Barev Today-ը գրում է, որ շվեյցարական ժամացույցների հայկական տարբերակի յուրահատկությունն այն է, որ պատրաստվում են ձեռքով։
Ժամանակի պահապանները
Ժամացույցների հանդեպ սերը մանկությունից է եկել։ Դեռ փոքր տարիքում Սասունն ապրում էր ժամացույցների բարդ աշխարհում և հանգստյան օրերին ու ամառային արձակուրդներին աշխատում էր հոր կողքին, որը ժամացույցների արտադրությամբ զբաղվող խոշոր ընկերությունների խմբի տնօրենն էր ու համասեփականատերը։
Երբ Սասունը դարձավ 17 տարեկան, սկսեց աշխատել հոր ընկերությունում և խորացնել գիտելիքները։
Նրա ջանքերն իզուր չէին, քանի որ 2004 թվականի գարնանը Սասունը Տերանովայի հետ որոշեց հիմնադրել Cvstos ապրանքանիշը։
Երիտասարդ սկսնակ հայ գործարարը բախվեց մի շարք դժվարությունների, նրա առջև խնդիր էր դրված` շարունակել ուսումը կամ միանալ հոր գործին։
«Հաջողակ գործարար դառնալու համար պետք է էնտուզիաստ լինել ու նվիրվել սեփական գործին։ Այն, ինչ ունեմ այսօր, քրտնաջան աշխատանքի, հորս աջակցության ու սեփական ուժերի հանդեպ ունեցած հավատի արդյունք է», — նշում է Սիրմակես-կրտսերը։
Այսօր Սասունը ամենաթանկ ժամացույցների շվեյցարական ընկերության գործադիր տնօրենն է ու համահիմնադիրը։ Վերլուծական մտածողությունն ու կազմակերպչական հմտությունները օգնել են նրան, որ աշխատանքի ընդունի 50 պրոֆեսիոնալ մասնագետի։
Ժամագործներն ամեն օր սեփական ձեռքերով սպիտակ, կարմիր, կանաչ ու դեղին ոսկուց ադամանդապատ ժամացույցներ են ստեղծում, որոնց գինը տատանվում է 50 հազարից մինչև մի քանի միլիոն եվրոյի սահմանում։
Այս ապրանքանիշի ժամացույցներ են կրում Ֆրանսիայի, Իտալիայի, Բելգիայի, Գերմանիայի, Անգլիայի, Չինաստանի, ԱՄՆ-ի ու Ռուսաստանից քաղաքական գործիչներն ու գործարարները, դերասաններն ու ռեժիսորները։
Սիրմակես-կրտսերի ժամացույցները ոչնչով չեն զիջում Franck Muller Watchland ապրանքանիշին։ Հնարավոր է, որ տաղանդավոր երիտասարդը հետագայում շվեյցարական թանկարժեք ժամացույցների միանգամից երկու ընկերության սեփականատեր դառնա, գրում է Barev Today-ը։
