ԵՐԵՎԱՆ, 29 հունվարի — Sputnik. Հայաստանի Հանրապետական կուսակցության պատգամավորները Sputnik Արմենիայի թղթակցի հետ զրույցում հայտնեցին, որ կրթության ու գիտության նախարար Արմեն Աշոտյանի հնարավոր հրաժարականի և նոր պաշտոնին նշանակման մասին որևէ տեղեկություն չունեն։
Որոշ տվյալների համաձայն` նախարարական պորտֆելը կարող է փոխանցվել Հանրապետականների կոալիցիոն նոր գործընկերոջը` Դաշնակցություն կուսակցությանը։ Այդ պաշտոնի հավակնորդների թվում է նաև կրթության նախկին նախարար Լևոն Մկրտչյանը։
ՀՀԿ խմբակցության ղեկավար Վահրամ Բաղդասարյանը չցանկացավ որևէ մեկնաբանություն տալ ու հայտնեց, որ այսօր «պապիկ է դարձել»։
Խմբակցության քարտուղար Գագիկ Մելիքյանը ասաց, որ որևէ տեղեկատվության չի տիրապետում։
«Ես ոչինչ չգիտեմ», — ասաց նա։
«Ժառանգություն» կուսակցության փոխնախագահ Արմեն Մարտիրոսյանն իր հերթին նշեց, որ հավանական փոփոխությունների վերաբերյալ որևէ տեղեկություն չունի, սակայն կարծում է, որ «Աշոտյանը դիվանագիտական ոլորտում իրեն ավելի լավ կդրսևորի, քան շատ-շատերը»։
Ինչ վերաբերում է գիտության ու կրթության պաշտոնին Լևոն Մկրտչյանի հավանական նշանակմանը, ապա Մարտիրոսյանը կատակեց` ասելով «որ նրա մոտ դա արդեն սովորություն է դարձել»։ Մկրտչյանն այդ պաշտոնը զբաղեցրել է երեք անգամ` 1998-1999, 2001-2003 և 2006-2008 թվականներին։
Աշոտյանի հարցը կքննարկվի ՀՀԿ այսօրվա գործադիր խորհրդի նիստում։
Արմեն Աշոտյանը նախարարի պաշտոնում նշանակվել է 2009 թվականի մայիսի 12-ին։ Պաշտոնավարման շուրջ 7 տարում բազմաթիվ անգամ խոսվել է, որ Աշոտյանն ազատվում է պաշտոնից ու դեսպան է նշանակվելու (անցյալ անգամ նրան Գերմանիայի դեսպան էին «նշանակել»)։
