ԵՐԵՎԱՆ, 29 հունվարի-Sputnik. ՀՀ ԱՆ «Հիվանդությունների վերահսկման ու կանխարգելման ազգային կենտրոնի» տնօրեն Արտավազդ Վանյանը ծնողներին խորհուրդ է տալիս` թեկուզ թեթև հարբուխ նկատելուն պես երեխային դպրոց չտանել։
«Մենք պիտի համատեղ աշխատանք կատարենք, որ դպրոցների ու նախադպրոցական հաստատությունների վերաբացումից հետո հիվանդության տարածման երկրորդ ալիք չգրանցվի»,-ասաց Արտավազդ Վանյանը։
Նրա տեղեկացմամբ` դպրոցներում ժամանակավորապես հետաձգվելու են ֆիզկուլտուրայի դասընթացները, որպեսզի բացառվի երեխաների մրսելու հավանականությունը։ Ժամանակավորապես փակ են լինելու նաև բուֆետները, որտեղ սովորաբար աշակերտների կուտակումներ են լինում, ինչը բարենպաստ միջավայր է դառնում գրիպի տարածման համար։
«Օրեր առաջ Առողջապահության նախարար Արմեն Մուրադյանը խորհրդակցություն էր հրավիրել, որին ներկա էին նաև ՏԿԱԻ և ԿԳ նախարարները։ Քննարկվեց այն հարցը, որ դպրոցներում ու նախադպրոցական հաստատություններում պետք է պահպանվի ջերմային ռեժիմը»,-ավելացրեց Արտավազդ Վանյանը։
Այս պահին նշված հաստատություններում ջերմային մոնիթորինգը սկսված է։
Հիշեցնենք, որ սուր վարակիչ հիվանդությունների ակտիվացման պատճառով Առողջապահության նախարար Արմեն Մուրադյանի առաջարկով դպրոցական արձակուրդը երկարաձգվել էր 3 շաբաթով։ Հայաստանը հայտնվել էր համաճարակի եզրին. դեպքերի 80 տոկոսը 0-18 տարեկան երեխաների մոտ էին գրանցվել։
Այսօր Հայաստանում սուր վարակիչ հիվանդությունները նահանջում են։ Շուրջ 46 տոկոսով նվազել է վերակենդանացման բաժանմունքներում բուժում ստացողների թիվը։ Վերջին տվյալով` հանրապետության հիվանդանոցներից սուր շնչառական վարակներից և թոքաբորբից ապաքինմամբ դուրս է գրվել ավելի քան 200 մարդ։ Նրանցից 131-ն ընդունվել էր սուր շնչառական վարակով (96-ը` մինչև 18 տարեկան), իսկ 85-ը` թոքաբորբով (37-ը` մինչև 18 տարեկան)։
