ԵՐԵՎԱՆ, 29 հունվարի- Sputnik. Չինաստանի քաղաքացի Թան Յունչժին մահապատժի է ենթարկվել նորածիններին հափշտակելու և վաճառելու համար, ուրբաթ դատարանի որոշումն ի կատար է ածվել, հաղորդում է ՌԻԱ Նովոստին` հղում անելով China News Service գործակալությանը։
Սահմանվել է, որ Յունչժենը 5 տարի շարունակ` 2008-2013թթ.-ին, իր հանցակիցների հետ առևանգել և վաճառել է երեխաների։ Նորածիններին գողացել են երկրի հարավ-արևմուտքում և վաճառել կենտրոնական հատվածում։ Այդ շրջանում հանցագործների զոհ է դարձել 22 երեխա։
Նշվում է, որ Յունչժիի «բիզնեսի» գործընկերները դատապարտվել են ազատազրկման։
ՉԺՀ-ում երեխաների առևտուրը հազվադեպ չէ։ Իրենց երեխաներին վաճառում են նույնիսկ ծնողները։ Ամենից հաճախ այդպես վարվում են աղքատ ընտանիքները` իրենց նյութական դրությունն ինչ-որ կերպ շտկելու համար։ Գնորդները հարուստ մարդիկ են, որոնք չեն կարող սեփական երեխաներ ունենալ։ Տղաներն ավելի թանկ արժեն, քան աղջիկները։
Անցած տարի չինական դատարաններում 853 դիմում է ստացվել երեխաների վաճառքի մասին, համեմատության համար երեք տարի առաջ այդ թիվը հասել է 2 հազարի։
