ԵՐԵՎԱՆ, 29 հունվարի — Sputnik. Գյումրու ռուսական ռազմակայանում դեկտեմբերի 29-ին մեկնարկած դատական նիստի ժամանակ պետք է դահլիճում խոսեին սպանված Ավետիսյանների դուստրերը` Լուսինե Ավետիսյանը, Անահիտ Կոշտոյանը, և փեսան` Եգոր Ադամյանը, սակայն նրանք նշեցին, որ ի վիճակի չեն խոսելու, և դատավորի որոշմամբ հրապարակվեցին նրանց նախաքննական ցուցմունքները։
Նրանք ցուցմունքներում նշել էին, որ իրենց հարազատները սովորական մարդիկ են, կապ չեն ունեցել ռազմակայանի հետ, Պերմյակովին չեն ճանաչել։ Հրապարակվեցին նաև ցուցմունքներ` Ավետիսյանների տանը հայտնաբերված բջջային հեռախոսների, հագուստի և փակ դռան վերաբերյալ։
Sputnik Արմենիայի թղթակիցը հայտնում է, որ դատարանի դահլիճում ցուցմունք տվեց սպանված Վալերի Պերմյակովի գործով ամենակարևոր վկաներից մեկը` Սերյոժա Ավետիսյանի եղբոր աղջիկը ` Կարինե Ավետիսյանը, ով նաև Ավետիսյանների պատկից հարևանն է։
Կարինե Ավետիսյանը նշեց, որ դեպքի օրը լսել է միայն մի ձայն, որը երկրաշարժի աղմուկի է նմանեցրել ։
«Հունվարի 12-ի ժամը 6։20 ուժեղ գմփոց լսվեց, մտածեցի` երկրաշարժ է, դուրս եկա բակ, մի պահ լսեցի փոքրիկ Սերյոժայի ձայնը։ Բակում շատ մութ էր, արտասովոր որևէ բան չկար։ Նորից տուն գնացի, առավոտյան արթնացա ու շտապեցի աշխատանքի։ Բակում կրկին արտասովոր բան չնկատեցի, ոչ մի աղմուկ չկար, դարպասի մոտ ընկած թաշկինակ տեսա։ Մտածեցի` հորեղբորս տղան է գցել, դարպասի դուռը մի փոքր բաց էր, դեպքի մասին իմացա աշխատանքի վայրում»,- նշեց Կարինե Ավետիսյանը` կրկին փաստելով, որ իր լսած ձայնը կրակոցի չի նմանեցրել։
Խոսելով երեխաների մասին` նշեց, որ փոքրիկի ձայնը մի պահ է լսել. «Եթե արտասովոր բան լսեի, տուն կմտնեի»,- ասաց Կարինեն։ Ի դեպ, նա նշեց, որ իրենց բակում ջրի աղբյուր չունեն (վարկածներից մեկն այն է եղել, որ Պերմյակովը մտել է բակ` ջուր խմելու նպատակով), իրենց դարպասի դուռն էլ հիմնականում փակ է, երեկոյան ժամերին սողնակը գցում են, իսկ եթե սողնակը գցած է, ապա դրսից որևէ մեկը չի կարող բացել դուռ, ներս կարող են մտնել միայն դարպասի վրայով։
Գյումրիում, որտեղ տեղակայված է 102-րդ ռուսական ռազմակայանը, 2015 թվականի հունվարի 12-ին սպանվել էր մի ամբողջ ընտանիք, մեկուկես տարեկան երեխան մահացել էր մեկ շաբաթ անց հիվանդանոցում։ Հանցագործության կասկածանքով նույն օրը ձերբակալվել էր ռուս պայմանագրային զինծառայող Վալերի Պերմյակովը: Նա փորձել էր անցնել Թուրքիայի տարածք, և ռուս սահմանապահները նրան հայտնաբերել էին հենց սահմանին: Զենք հափշտակելու և դասալքության համար 2015 թվականի օգոստոսի 12-ին Գյումրիում դատարանը Պերմյակովին դատապարտել է 10 տարի ազատազրկման։ Սպանության մասին գործը հանձնվել է հայկական կողմին և քննվում է առանձին, առաջին նիստը տեղի էր ունեցել դեկտեմբերի 18-ին։
