ԵՐԵՎԱՆ, 27 հունվարի — Sputnik. ԵԱՀԿ ՄԽ հայտարարությունը ցույց տվեց, որ ԵԽԽՎ-ի` Ղարաբաղի վերաբերյալ երկու բանաձևերը չեն համընկնում միջնորդների վարած քաղաքականության հետ, կարծում է Հայաստանի իշխող Հանրապետական կուսակցության խմբակցության պատգամավոր Գագիկ Մինասյանը։
Հունվարի 26-ին ԵԽԽՎ-ն մերժեց բրիտանացի խորհրդարանական Ռոջեր Ուոլթերի առաջարկած «Բռնության աճը Լեռնային Ղարաբաղում և Ադրբեջանի մյուս օկուպացված տարածքներում» զեկույցը։
«Համանախագահներն ուղիղ ասացին, որ ԵԽԽՎ ներկայացրած բանաձևերը չեն համապատասխանում ՄԽ քաղաքականությանը», — ասաց Մինասյանը։
Ավելի վաղ ԵԱՀԿ ՄԽ-ն կոչ էր արել ԵԽԽՎ-ին զերծ մնալ «ՄԽ մանդատին վնաս հասցնող և բանակցությունների շարունակվող գործընթացը դժվարացնող» քայլերից։
Պատգամավորի խոսքով` սա կարևոր է ոչ միայն Հայաստանի, այլև Ադրբեջանի համար։ Ղարաբաղի հարցում նա կոչ արեց աշխատել հենց ԵԱՀԿ ՄԽ համանախագահների հետ, ովքեր հակամարտության կարգավորման միջնորդության հարցում միջազգային մանդատ ունեն։
Sputnik Արմենիայի այն հարցին, թե ինչպե՞ս է նա վերաբերվում այն հարցին, որ Իրանը շահագրգռված է Ղարաբաղյան հարցում միջնորդի դեր ստանձնելու հարցում, պատգամավորը նշեց, որ իսլամական հանրապետության դիրքորոշումը միշտ կշռադատված ու բարենպաստ է եղել Հայաստանի համար։
Իրանի ԱԳՆ պաշտոնական ներկայացուցիչ Հուսեյն Ջաբեր Անսարին Բաքվում հունվարի 25-ին հայտարարել է, որ Իրանը պատրաստ է միջնորդ հանդիսանալ Հայաստանի ու Ադրբեջանի միջև լեռնային Ղարաբաղի հակամարտության կարգավորման հարցում։
«Իրանը միշտ կշռադատված դիրքորոշում է արտահայտել ղարաբաղյան հակամարտության կարգավորման վերաբերյալ, նա բանակցություններ վարելու և հակամարտությունը խաղաղ ճանապարհով լուծելու կողմնակից էր։ Ունենալ նման երկիր, որն իսլամական աշխարհում մեծ ազդեցություն ունի և կշռադատված դիրքորոշում ղարաբաղյան հակամարտության հարցում, բավականին բարենպաստ է և կարող է օգնել ԵԱՀԿ ՄԽ գործունեությանը», — կարծում է Մինասյանը։
Ընդ որում նա կարծում է, որ Իրանը ՄԽ-ին զուգահեռ կարող է միջնորդական գործունեություն վարել։ Մինասյանի խոսքով` Իրանի աջակցության հարցը պետք է դիտարկել ԵԱՀԿ ՄԽ ձևաչափում, քանի որ լավ նպատակներ հետապնդող ոչ բոլոր մտադրությունները կարող են նույն արդյունքների հանգեցնել։
«Նրանք չպետք է հակադրվեն այն ռազմավարական ուղղությանը, որը վարում է ԵԱՀԿ ՄԽ-ն։ Հենց այնտեղ է կենտրոնացած այն ողջ փաստացի ու ինտելեկտուալ ներուժը, որը եղել է հակամարտության ժամանակ», — ասաց Մինասյանը։
Նա կարծում է, որ եթե ռազմավարական ուղղություն կա ի դեմս ԵԱՀԿ ՄԽ-ի, ապա Իրանի դիրքորոշումն այդ պայմաններում, կարելի է միայն ողջունել։
