ԵՐԵՎԱՆ, 27 հունվարի — Sputnik. ԵԽԽՎ-ն Ղարաբաղի վերաբերյալ զեկույցների քննարկման ժամանակ փորձեց «ոչ ոքի չնեղացնել»։ ԵԽԽՎ-ի հայկական խորհրդարանի պատվիրակությունը քննարկման արդյունքներին հետևյալ կերպ է արձագանքել.
«Մենք երախտագիտություն ենք հայտնում ԵԽԽՎ այն պատվիրակներին, ովքեր ցուցաբերեցին սկզբունքային դիրքորոշում ու ԼՂ հիմնահարցի քաղաքական կարգավորման գործընթացի լիակատար ըմբռնում երկու բանաձեւերի քվեարկության ժամանակ եւ իրենց վճռական դիրքորոշմամբ մերժեցին Ռոբերտ Ուոլթերի՝ ԼՂ կարգավորման համար վտանգավոր զեկույցը»։
Ընդ որում ԵԽԽՎ-ն հաստատեց մեկ այլ զեկույց, որը նույնպես հայկական կողմից բողոքի է արժանացել` «Ադրբեջանի սահմանամերձ բնակավայրերի բնակիչները կանխամտածված կերպով զրկվում են ջրից» Սարսանգի ջրամբարի մասին բանաձևը» (զեկուցող` Միլիցա Մարկովիչ)։
Ավելի վաղ ԵԱՀԿ ՄԽ-ն կոչ է արել ԵԽԽՎ-ին զերծ մնալ «ՄԽ մանդատին վնաս հասցնող և բանակցությունների շարունակվող գործընթացը դժվարացնող» քայլերից։ Նման հայտարարություն է հաստատվել նաև ԵՄ-Հայաստան խորհրդարանի համագործակցության հանձնաժողովի համատեղ փաստաթղթում։
Բնականաբար, այս երկու կառույցների հայտարարությունը որոշակի ազդեցություն է ունեցել ԵԽԽՎ պատգամավորների վրա, ովքեր պետք է ուսումնասիրեն մարդու իրավունքներին վերաբերող, այլ ոչ էթնիկ ազգային հակամարտության բարդ հարցերը։
Մյուս կողմից` այլ կառույցների ներկայացրած «խորհուրդների» ամբողջական ընդունումը ԵԽԽՎ-ի ` որպես «իրեն հարգող կազմակերպություն» համար այդքան էլ ճիշտ չէր լինի։
Այդ իսկ պատճառով ավելի շուտ այն սկզբունքային զեկույցը, որը ոչ միայն Հայաստանի, այլև ՄԽ-ի դժգոհությունն է առաջացնում, ԵԽԽՎ-ում տապալեցին (ձայների մեծամասնությամբ)։ Դահլիճում ներկա գտնվող պատգամավորներից 66-ը կողմ քվեարկեցին, 70-ը` դեմ, 45-ը ձեռնպահ մնացին։
Իսկ «ջրի մասին» երկրորդ, ոչ այդքան սկզբունքային զեկույցը, հաստատվեց։
Բնականաբար, այս գործոնը միակը չէր, որը որոշեց քվեարկության արդյունքները, սակայն այն թերագնահատել էլ պետք չէ։
