ԵՐԵՎԱՆ, 27 հունվարի — Sputnik. Եթե ռուսական քաղաքական վերնախավը ցանկանա, որ ԱՊՀ երկրների շինարարական ընկերությունները փոխարինեն թուրքական ընկերություններին, ապա մենք կունենանք ինտեգրման ևս մեկ հարթակ, Sputnik Արմենիա ռադիոկայանի եթերում ասաց «Ինտեգրացիա և զարգացում» հետազոտության և վերլուծության հասարակական կազմակերպության նախագահ Արամ Սաֆարյանը ։
«Մենք շատ լավ հասկանում ենք, որ արգելքի պայմաններում էլ թուրքական լոբբիստական կազմակերպություններն ու ուժերը Մոսկվայում չեն անհետացել, և նրանք շարունակելու են գործել եթե ոչ բացահայտ, ապա թաքնված, նրանք հնարավորություն են փնտրելու, որպեսզի պատժամիջոցները վերացվեն և բացեն ճանապարհը թուրքական սննդամթերքի արտահանման և շինարարական ընկերությունների համար։ Բայց դա շուտ չի լինի, որովհետև հայտնի է` արգելքները, պատժամիջոցները սահմանվում են արագ, սակայն հանվում են դժվարությամբ և երկար ժամանակամիջոցում»,- նշեց Սաֆարյանը։
Կապալառուների թուրքական ասոցիացիայի համաձայն, թուրքական շինարարական ընկերությունները 1988թ.-ից ի վեր Ռուսաստանում 60 մլրդ դոլարի նախագծեր են իրականացրել։ Ռուսական նախագծերից ստացված եկամուտն անցած տարի 4 մլրդ դոլար է կազմել։
Ըստ փորձագետի, պետք է արագ ուսումնասիրվի ռուսական շինարարական ոլորտում հայկական ընկերությունները ներկայացնելու հարցը։
Սաֆարյանը կարծում է, որ Հայաստանը նախևառաջ պետք է պարզի` որքանով է լուրջ և հետևողական Ռուսաստանի համար Թուրքիայի նկատմամբ սահմանված այս արգելամիջոցների խնդիրը։ Այսինքն ` եթե այն կարող է ձգվել մի քանի տարի, ապա դա ուղղակի ազդանշան է ԱՊՀ երկրների արտահանողներին, որ նրանք մեծացնեն արտահանման ծավալները։
Հայ տնտեսագետները հաշվարկել են, որ եթե քաղաքական որոշում ընդունվի այն մասին, որ այս վիճակը պետք է պահպանվի մի քանի տարի, ապա գյուղատնտեսական ապրանքերի արտահանման ծավալը Հայաստանից Ռուսաստան մոտավորապես 4 տարում կարող է 4 անգամ աճել։
Հունվարի 25-ին ՌԴ նախագահ Վլադիմիր Պուտինը հայտարարել էր, որ Թուրքիայի դեմ պատժամիջոցները կընդլայնվեն։ Թուրքիայի դեմ սահմանափակումներ կկիրառվեն շինարարության ոլորտում, որտեղ այժմ աշխատում է 300 թուրքական ընկերություն 50 միլիարդ դոլարի պայմանագրերով։ ՌԴ նախագահն ընդգծել էր, որ պատժամիջոցների ընդլայնման շնորհիվ Ռուսաստանում կարող է ավելի քան 87 հազար աշխատատեղ ստեղծվել:
