ԵՐԵՎԱՆ, 27 հունվարի- Sputnik. Հայաստանի ֆուտբոլի ֆեդերացիան հայտարարել է Ֆուտբոլի միջազգային ֆեդերացիայի (ՖԻՖԱ) նախագահի պաշտոնում 45-ամյա Ջանի Ինֆանտինոյի թեկնածությանն աջակցելու մասին, ով այժմ զբաղեցնում է ՈՒԵՖԱ-ի գլխավոր քարտուղարի պաշտոնը։
Շվեյցարիայում հունվարի 22-ին կայացել է հանդիպում, որին մասնակցել են ՈՒԵՖԱ-ի անդամ երկրների ֆուտբոլի ֆեդերացիայի գլխավոր տնօրեններ, որի ընթացքում քննարկվել է նաև Ինֆանտինոյի նախընտրական ծրագիրը։
Ծրագիրը ներառում է նոր աշխարհայացքի յուրահատուկ ճանապարհային քարտեզ, համաշխարհային ֆուտբոլի զարգացման տարբեր ուղղություններ և ապագա մարտահրավերներին դիմակայելու ծրագրեր։
«Հայաստանի ֆուտբոլի ֆեդերացիան, գնահատելով ներկայացված ծրագրի կարևորությունը ֆուտբոլի զարգացման տեսանկյունից, իր պաշտպանությունն է հայտնում Ջիանի Ինֆանտինոյի թեկնածությանը ՖԻՖԱ-ի նախագահի կայանալիք ընտրություններում և կսատարի վերջինիս՝ ընտրվելու պարագայում իր ծրագրային դրույթներն իրականացնելու գործում»,- ասվում է հաղորդագրությունում։
Եվրոպայի ֆուտբոլի ասոցիացիաները միաձայն սատարել են Ջանի Ինֆանտինոյի թեկնածությանը։
Մինչև ՈՒԵՖԱ տեղափոխվելը Ջանի Ինֆանտինոն եղել է Նևշատելի համալսարանին կից Սպորտի ուսումնասիրման միջազգային կենտրոնի գլխավոր քարտուղար, նախկինում զբաղեցրել է տարբեր ֆուտբոլային ասոցիացիաներում խորհրդականի պաշտոնը, այդ թվում` Իտալիայի, Իսպանիայի և Շվեյցարիայի պրոֆեսիոնալ լիգաներում։
ՖԻՖԱ-ի ղեկավարի ընտրությունները տեղի կունենան փետրվարի 26-ին շվեյցարական Ցյուրիխում։ Ինֆանտինոյից բացի, նախագահի ընտրություններին կմասնակցեն Ֆուտբոլի ասիական համադաշնության ղեկավար շեյխ Սալման բին Իբրահիմ ալ Խալիֆան Բահրեյնից, Հորդանանի արքայազն Ալ բին Ալ Հուսեյնը, ՀԱՀ բնակարանաշինության հարցերի նախկին նախարար և Նելսոն Մանդելայի համախոհ Տոկիո Սեկսվալեն և ՖԻՖԱ-ի գլխավոր քարտուղարի նախկին տեղակալ, ֆրանսիացի Ժերոմ Շամպանը։
