ԵՐԵՎԱՆ, 26 հունվարի- Sputnik. Չնայած անձնակազմում գրանցված ցավալի կորուստներին` հայկական բանակը բարձրացրել է իր մարտունակությունը և գտնվում է լավ բարոյահոգեբանական վիճակում։
Ամփոփելով 2015թ.-ի արդյունքները` Օհանյանը նշեց, որ չնայած հայ-ադրբեջանական սահմանին և Ղարաբաղում զորքերի շփման գծում պահպանվող բարդ իրավիճակին` տարին կարելի է հաջողակ համարել զինված ուժերի զարգացման առումով։
Ռուսաստանի հետ ռազմատեխնիկական համագործակցությունը
Բոլորովին վերջերս մամուլում լուրեր հայտնվեցին, որ ծանր տնտեսական իրավիճակը կարող է ազդել պաշտպանության ոլորտում Ռուսաստանի և Հայաստանի համագործակցության վրա։ Մասնավորապես, կասկածի տակ է առնվել Ռուսաստանի կողմից սպառազինության համար նախատեսված 200 միլիոն դոլար վարկի տրամադրման մասին համաձայնագիրը։
Օհանյանը նշեց, որ ռազմական և ռազմատեխնիկական համագործակցությունն այն երկրների հետ, որոնց հետ կան համապատասխան ծրագրեր, իրականանում են գոյություն ունեցող պայմանավորվածությունների հիման վրա, դա հատկապես վերաբերում է Ռուսաստանին։
«Ավելին, 2013թ.-ին ստորագրված համաձայնագրի շրջանակում մենք համագործակցում ենք Հայաստանին ռազմական տեխնիկայի նորագույն տեսակներով, հեռահար և ճշգրիտ սպառազինությամբ ապահովելու ոլորտում։ Այդ ամենն իրականանում է ժամանակին և մեր ծրագրերի շրջանակում»,- ասաց Օհանյանը։
Նա ընդգծեց, որ հայկական զինված ուժերը, լինելով հաղթանակած բանակ, մարտունակ և մրցունակ են մնում։
Բարձրացնելով մարտունակությունը, մարտական խնդիրների լուծման հնարավորությունները, մարտական հերթապահությունից պաշտպանությանն անցում կատարելը` հայկական բանակը, նախարարի կարծիքով, գերազանցում է հակառակորդին բարոյահոգեբանական հատկանիշներով, ինչը, չնայած հակառակորդի քանակական գերազանցությանը, ապահովում է երկրի պաշտպանությունը։
Հայաստանը` ՀԱՊԿ նախագահ
Օհանյանին հաճախ են դիմում այն հարցով, թե ՀԱՊԿ-ն ինչու է թույլ արձագանքում Ղարաբաղում իրավիճակի սրմանը։ Նա հիշեցրեց ՀԱՊԿ կայացման գործում Հայաստանի դերը, նաև ներկայացրեց երկրի գերակայությունները` որպես կազմակերպության նոր նախագահ։
«Հայաստանը ՀԱՊԿ լիարժեք անդամ է և վերջին տարիներին լուրջ աշխատանք է կատարել կազմակերպության հեղինակությունը բարձրացնելու համար։ Մենք աշխատել ենք ռազմական ներուժի կատարելագործման ուղղությամբ, մեր առաջարկով ձևավորվել է ռազմական հանձնաժողով։ Մենք անմիջականորեն աշխատել ենք Արագ արձագանքման հավաքական ուժերի հնարավորությունների ընդլայնման ուղղությամբ»,- ասաց Օհանյանը։
Նախարարը նշեց, որ ցանկանում է տեսնել ՀԱՊԿ-ն որպես լիարժեք, ուժեղ ռազմաքաղաքական կառույց, որը կաջակցի Հայաստանին, որն ընդհանուր սահմաններ չունի մյուս անդամների հետ։
Նա հաղորդեց, որ այժմ Հայաստանում է ՀԱՊԿ գլխավոր քարտուղար Նիկոլայ Բորդյուժան, ով հունվարի 28-ին` Հայոց բանակի օրը, կմասնակցի բոլոր տոնական միջոցառումներին։
«Նա նաև հանդիպումներ կունենա երկրի բարձրագույն ղեկավարության հետ, կքննարկի ՀԱՊԿ անդամների համագործակցությունը, կազմակերպության ռազմական բաղադրիչների զարգացման հարցը»,- ասաց Օհանյանը։
Անապահով ընտանիքների անբացատրելի կորուստները
Սահմանին իրավիճակի սրումը, որի վերաբերյալ հայ հասարակությունն ակնկալում է ՀԱՊԿ ավելի ակտիվ արձագանքը, սովորաբար ուղեկցվում է զոհերով։ Բայց վերջին շրջանում նկատվում է որոշակի օրինաչափություն. առաջնագծում զոհվում են առավելապես անապահով ընտանիքների ժամկետային զինծառայողները։
«Վերջին տարիներին մենք լուրջ միջոցառումներ ենք անցկացնում նորակոչիկներին արդար տեղաբաշխելու ուղղությամբ։ Նրանց բաշխումն իրականացվում է` հաշվի առնելով ոչ թե սոցիալական վիճակը, այլ կրթությունը, առողջությունը և ֆիզիկական տվյալները։ Չգիտեմ, թե վերջին տարիներին ինչու է առկա նման հանգամանք»,- խոստովանեց նախարարը։
Օհանյանի խոսքով` պաշտպանության նախարարությունը, զորամասերի հրամանատարներն ամեն ինչ անում են, որպեսզի աջակցեն զոհված զինծառայողների ընտանիքներին։ Նա գոհունակություն հայտնեց այն փաստից, թե վերջին տարիներին հայ հասարակությունն ինչպես է աջակցում նման ընտանիքներին։
«Ապագայում մենք անպայման ավելի ուշադիր կլինենք այդ հարցի նկատմամբ»,- խոստովանեց Օհանյանը։
Ի դեպ, նրա խոսքով, 2016թ.-ը կլինի հրամանատարական կազմի որակավորման բարձրացման տարի։
