ԵՐԵՎԱՆ, 26 հունվարի — Sputnik. Հնդկաստանի Մահարաշտրա նահանգում ձերբակալվել է շուրջ 500 կին ակտիվիստ, որոնք ցանկացել են ներխուժել տաճար, որտեղ հարյուրամյակներ շարունակ մուտքը թույլատրվել է միայն տղամարդկանց, երեքշաբթի հաղորդել է NDTV հեռուստաալիքը։
Տաճարի սրբության սրբոցը համարվում է սև քարը, որը տեղադրված է հարթակի վրա` բաց երկնքի տակ։ Քարը մարմնավորում է Շանի աստվածությունը, որը կապված է Սատուրն մոլորակի հետ։ Շուրջ 500 տարի կանանց արգելվել է մոտենալ դրան։ Միայն տաճարի տղամարդ սպասավորները կարող են բարձրանալ ինն աստիճաններով և կատարել սրբությունը յուղով օծելու ծեսը։
Կանանց թույլ չեն տվել մոտենալ տեղի շուրջ հազար բնակիչները և ոստիկանությունը տաճարից 40 կմ հեռավորության վրա` Սուպե քաղաքի անցակետի մոտ։ Ranragini Bhumata Brigade շարժման ակտիվիստները, որոնք պայքարում են կանանց իրավունքների համար, ավելի վաղ վեց ավտոբուսով դուրս են եկել Պուն քաղաքից և մտադիր են եղել մտնել տաճար` ցանկանալով վերջ դնել դարավոր ավանդույթին։ Սակայն քաղաքի բնակիչների բազմությունը խոչընդոտել է նրանց. կանանցից ոմանք պառկել և նստել են ճանապարհին` փակելով ակտիվիստների ճանապարհը։
«Սա սև օր է կանանց համար։ Նրանք պետք է բացատրեն, թե մենք ինչու չենք կարող մտնել տաճար»,- հեռուստաալիքին հայտարարել է ակտիվիստներից մեկը։
Տեղի բնակչուհիներն այլ կարծիքի են։
«Նրանք կարող են պայքարել իրենց իրավունքների համար այլ ոլորտներում, բայց ինչու՞ փոխել նման հին ավանդույթը»,- վրդովվել է շարժման հակառակորդ կանանցից մեկը։
Կանանց մուտքը սրբավայր թույլատրելու արշավը սկսվել է անցյալ տարվա նոյեմբերին։ Այն ժամանակ, երբ երիտասարդ կինը դիպել էր քարին, տաճարը համարվել էր անարգված, և սպասավորները կրկնակի ծես են անցկացրել այն մաքրագործելու համար։ Ավանդույթներին հավատարիմ մարդկանց կարծիքով` կանանց թույլ չեն տվել սրբատեղի այն պատճառով, որ «Շանիից արձակվող հզոր թրթիռները» կարող են վնասակար լինել նրանց համար, նշում է հեռուստաալիքը։
