ԵՐԵՎԱՆ, 26 հունվարի — Sputnik. Դատական ակտերի հարկադիր կատարման (ԴԱՀԿ) ծառայությունը 3 միլիոն բնակչություն ունեցող Հայաստանում 2015թ.-ին հարուցել է շուրջ 900 հազար կատարողական վարույթ։ Երեքշաբթի լրագրողներին նման տվյալներ ներկայացրեց ԴԱՀԿ ծառայության ղեկավար Միհրան Պողոսյանը։
2015թ.-ին հայցվորների օգտին բռնագրավվել է շուրջ 25 մլրդ դրամ (ավելի քան 50 մլն դոլար), որից պետբյուջե է մտել շուրջ 7 միլիարդը, ևս 14 մլրդ` իրավաբանական անձանց օգտին։ Անցյալ տարվա համեմատ այդ թիվը նվազել է 12 մլրդ դրամով։
Վարույթների քանակը Հայաստանի բնակչության թվի հետ համեմատելուց հետո (պաշտոնական տվյալներով` շուրջ 3 մլն), ստացվում է, որ միջինը յուրաքանչյուր ընտանիք ստացել է մեկական վարույթ։
Պողոսյանն առարկեց` ասելով, որ նման մաթեմատիկական հաշվարկն այնքան էլ ճիշտ չէ։
«Կան առանձին մարդիկ, որոնք ունեն հազար և ավելի կատարողական վարույթ։ Որոշ պարտատերեր ունեն 40 մլն դրամի վարչական վարույթներ»,- ասաց Պողոսյանը։
Նրա խոսքով` դա առավելապես վերաբերում է տաքսի ծառայությունների և երթուղային տաքսիների տերերին։
Վերջին շրջանում ԴԱՀԿ ծառայության կողմից վարորդները ստացել են ծանուցումներ հին չվճարված տուգանքների մասին։ Անկախ նրանից` դա համակարգի սխալ է եղել, թե ոչ, սակայն վճարման մասին կտրոնները չպահած վարորդները ստիպված են եղել կրկին վճարել։
Ինչպես պատմեց Sputnik Արմենիա պորտալին Աշոտը, մի քանի ամիս առաջ նա նման սխալ ծանուցում է ստացել անցյալ տարի ճանապարհային երթևեկության կանոնները խախտելու մասին, բայց կարողացել է ապացուցել իր իրավացիությունը։
«Ծանուցումը եղել է մեկ տարվա վաղեմության տուգանքի մասին։ Բարեբախտաբար ես պահել էի վճարումը հաստատող կտրոնը»,- ասաց Աշոտը։
Նա ծանուցումով և կտրոնով դիմել է ԴԱՀԿ ծառայություն, որտեղ նրան ասել են, որ համակարգում սխալ է տեղի ունեցել, և «ամեն ինչ կարգին է»։ Բայց Աշոտին ոչ մի ծանուցում չեն ուղարկել այն մասին, որ այլևս պարտք չունի` վերցնելով վճարման կտրոնը։
Վարորդը ստիպված է եղել երկրորդ անգամ դիմել ծառայություն, դիմում գրել, որից հետո ստացել է անհրաժեշտ ծանուցումը։
Պողոսյանը նաև կոչ է արել որպես չարիք չընդունել ԴԱՀԿ ծառայությունը և ըմբռնումով մոտենալ նրա աշխատանքին։
«ԴԱՀԿ-ն մի ծառայություն է, առանց որի պետությունը չի կարող գոյություն ունենալ։ Պետք չէ դիտարկել այն որպես ֆաշիստական կառույց»,- ասաց Պողոսյանը։
Ինչ վերաբերում է ծառայության աշխատանքի արդյունավետությունից դժգոհությանը, նա նշեց, որ տարվում են որակի բարելավման և հարուցված վարույթների փակման գործընթացն արագացնելու ակտիվ աշխատանքներ։
Պողոսյանի խոսքով` տեղեկատվական տեխնոլոգիաների ներմուծումը, այդ թվում` մարզային ներկայացուցչությունների բացումը և ողջ երկրում վճարային համակարգերի տեղադրումը թույլ է տվել զգալիորեն բարձրացնել ծառայության արդյունավետությունը։
«Դատական կատարողի և քաղաքացու միջև շփումը նվազագույնի հասցնելը հանգեցնում է նաևկոռուպցիոն ռիսկերի նվազեցման»,- ասաց Պողոսյանը։
