ԵՐԵՎԱՆ, 25 հունվարի- Sputnik. Խորհրդային շրջանի լեգենդար հետախույզ Գոհար Վարդանյանը հայտնի է «Անիտա» կեղծանունով։ Հունվարի 25-ին հայտնի հետախույզը նշում է իր 90-ամյակը: Նրա մասին խոսելիս անհնար է չհիշատակել նաև ամուսնուն՝ Գևորգ Վարդանյանին, որի հետ Գոհար Վարդանյանն ամուսնացել է երեք անգամ, և երկար տարիներ ի վեր միասին աշխատել են աշխարհի շատ երկրներում:
Ամուսնու հետ մասնակցել է Թեհրանի համաժողովի ընթացքում «մեծ եռյակի» առաջնորդների անվտանգության ապահովման գործողությանը: Հենց այդ ժամանակ է կանխվել «մեծ եռյակի» առաջնորդների՝ Ստալինի, Ռուզվելտի և Չերչիլի մահափորձը, որը ծրագրել էին հիտլերյան հատուկ ծառայությունները:
«Անգամ 90 տարեկանում Գոհար Վարդանյանը շատ գեղեցիկ կին է: Երբ առաջին անգամ նրանց տանն էի, նա ինձ դիմավորեց էլեգանտ զգեստով և հագուստին համապատասխան բարձրակրունկ կոշիկներով: Այդ հանդիպումից հետո նա միշտ այդպես է դիմավորում ինձ՝ ժպիտով բացատրելով, որ եթե մի անգամ գրել եմ այդ բարձրակրունկ կոշիկների մասին, ապա հիմա պետք է այդպես շարունակել»,- ՌԻԱ Նովոստիի հետ զրույցում նշել է «Ռոսիսյկայա գազետա»-ի գլխավոր խմբագրի տեղակալ, հետախուզության պատմաբան Նիկոլայ Դոլգոպոլովը:
Նրա խոսքով՝ Գոհար Վարդանյանն ապացուցում է, որ հետախույզների ընտանիքներում կանայք ավելի լռակյաց են, քան տղամարդիկ:
«Ասում են` կանայք շատախոս են։ Դա առասպել է: Անօրինական հետախույզների կանայք ավելի քիչ են սիրում խոսել: Գոհար Վարդանյանը մեր զրույցների ժամանակ դիմում էր ամուսնուն` Ժորա, իսկ կարելի՞ է այդ մասին խոսել»,- պատմել է լրագրողը:
Ժամանակին Գոհար Վարդանյանը հիանալի ռադիստ է եղել:
«Ռադիոգրամներ հաղորդելու վարպետությունը նա սովորել է շատ արագ, ինչն զարմացրել է նրա դասախոսներին»,- նշել է Դոլգոպոլովը:
«Շատ վճռական կին է եղել, արագ որոշումներ է կայացրել: Ի վերջո, նա անչափ բարի է, ինչը հազվագյուտ հատկանիշ է»,- ընդգծել է նա:
Հետաքրքիր է, որ Վարդանյան ամուսինները ծառայության բերումով ամուսնացել են երեք անգամ ՝ տարբեր երկրներում և տարբեր անուններով: Գոհար Վարդանյանը հարսանեկան զգեստ կրել է միայն առաջին անգամ՝ 1946թ.-ին Թեհրանում:
«Մնացած դեպքերում ուղղակի տոնական զգեստներ են եղել կամ կոստյումներ: Գնացել ենք ռեստորան ու նշել: Եվ դա շատ ուրախ է եղել»,- հիշել է հետախույզը:
