ԵՐԵՎԱՆ, 25 հունվարի – Sputnik. Իրանը պատրաստ է միջնորդ հանդես գալ Ադրբեջանի և Հայաստանի միջև առկա հակամարտությունը լուծելու գործում, հայտարարել է Իրանի ԱԳՆ-ի պաշտոնական ներկայացուցիչ Ջաբեր Անսարին։
Ադրբեջանցի լրագրողի հարցին ի պատասխան` դիվանագետն ընդգծել է, որ Իրանը հակամարտության առաջին իսկ օրից փորձել է կանխել այն և լուծել հակասությունները։
«Եթե մենք անդրադառնանք անցյալին, կտեսնենք, որ Իրանը փորձել է լարված պահերին կանխել հարևան երկրների` Ադրբեջանի և Հայաստանի միջև ծագած անհամաձայնությունները։ Այժմ եթե Ադրբեջանն ու Հայաստանը ցանկանան, Իրանը կարող է ստանձնել միջնորդի դերն ու որպես միջնորդ հանդես գալ այդ հակամարտության կարգավորման գործում»,- հայտարարել է Անսարին։
Նա հայտնել է նաև, որ ադրբեջանական ու իրանական դիվանագետները բանակցություններ են անցկացրել Ադրբեջանի նախագահ Իլհամ Ալիևի` Իրան կատարելիք հնարավոր այցի շուրջ։ Այցի մասին կհայտարարվի ավելի ուշ, եթե վերջնական որոշում ընդունվի։
Հայաստանի և Ադրբեջանի միջև Լեռնային Ղարաբաղի խնդրի շուրջ հակամարտությունը սկսվել է 1988թ.-ի փետրվարին, երբ Լեռնային Ղարաբաղի ինքնավար մարզը հայտարարեց Ադրբեջանական ԽՍՀ կազմից դուրս գալու մասին։ 1991թ.-ի սեպտեմբերին ԼՂԻՄ կենտրոնում` Ստեփանակերտում, հայտարարվեց Լեռնային Ղարաբաղի Հանրապետություն ստեղծելու մասին։ Ադրբեջանը դրան հաջորդած ռազմական հակամարտության ընթացքում կորցրեց հսկողությունը Լեռնային Ղարաբաղի նկատմամբ։
1992թ.-ից հակամարտության խաղաղ կարգավորման բանակցություններ են ընթանում ԵԱՀԿ Մինսկի խմբի շրջանակում։ Ադրբեջանը պնդում է իր տարածքային ամբողջականության պահպանումը, Հայաստանը պաշտպանում է չճանաչված հանրապետության շահերը, քանի որ ԼՂՀ-ն բանակցությունների կողմ չէ։
