ԵՐԵՎԱՆ, 25 հունվարի- Sputnik. Բրիտանացի գիտնականների հետազոտությունն ապացուցել է, որ Մեծ Բրիտանիայում դեռահասների շուրջ 2 տոկոսը տառապում է խրոնիկ հոգնածության ախտանիշով, որն ամենայն հավանականությամբ վիրուսային բնույթի հիվանդություն է, գրում է ՌԻԱ Նովոստին` ներկայացնելով Pediatrics ամսագրում տպագրված հոդվածը:
«Այս բացահայտումը կարևոր է, քանզի ցույց է տալիս, որ խրոնիկ հոգնածության ախտանիշը մեր կարծածից ավելի շատ է տարածված դեռահասների շրջանում: Այդ սինդրոմն ունեցող երեխաները, որոնք այցելում են Բատեում գտնվող հոսպիտալ, սովորում են միայն շաբաթական երկու օր, և նրանք բժիշկների օգնության կարիք ունեն»,- ասել է Բրիստոլի համալսարանի (Մեծ Բրիտանիա) գիտնական Էսթեր Քրոուլին:
Վերջին տարիներին բժիշկները գրանցել են, որ խրոնիկ հոգնածության սինդրոմ ունեցող հիվանդների թիվն աճել է: Հաճախորդների մեծ մասը տառապում է մի քանի ախտանիշով, որոնցից են հաճախակի ջղակծկումները, անքնությունը, հոգնածությունն ու գլխացավերը:
2009թ.-ին ամերիկյան կենսաբանների հրապարակած հոդվածում նշվում է, թե ինչպես է XMRV վիրուսն ազդում մարդու օրգանիզմի վրա: Երեք տարի անց այդ եզրակացությունները կասկածի տակ են դրվել, քանի որ հիվանդների արյան մեջ վիրուսի հետքեր այդպես էլ չեն գտել: Բոլորովին վերջերս գիտնականների մեկ այլ խումբ ցույց է տվել, որ խրոնիկ հոգնածության ախտանիշն իսկապես գոյություն ունի: Այն առաջանում է առայժմ անհայտ վարակների զարգացման հետևանքով:
Քրոուլին և նրա գործընկերները եզրակացրել են, որ այդ ախտանիշով տառապում են ոչ միայն մեծահասակները, այլ նաև երեխաները՝ հետևելով 12-18 տարեկան շուրջ 6000 բրիտանացի դպրոցականի առողջական վիճակին:
Ինչպես ընդգծում են գիտնականները, այդ ախտանիշը բուժելի է և դրա դեմ կարելի է պայքարել՝ օգտագործելով իմունային համակարգն ուժեղացնող միջոցներ, որոնք թույլ են տալիս գործել աշխատանքի նորմալ ռեժիմում: Այդ պատճառով դեռահասների այդ ոչ մեծ, բայց զգալի խումբն առողջապահական գերատեսչությունների օգնության ու աջակցության կարիքն ունի, եզրափակել են Քրոուլին և նրա գործընկերները:
