ԵՐԵՎԱՆ, 24 հունվարի- Sputnik. Հայաստանի Պետական միգրացիոն ծառայությունը 2015թ.-ին Ռուսաստան այցելելու վերաբերյալ 7843 դիմում է ստացել, որից 3869-ին թույլտվություն է տրվել: Նման տվյալներ են ներկայացված ՏԿԱԻՆ-ին առընթեր գործող ծառայության կայքում:
Հայկական կողմը գրեթե բոլոր դիմումներն ուղարկել է ՌԴ Դաշնային միգրացիոն ծառայություն, որը համապատասխան որոշումներ է կայացրել:
Ռուսաստանի Դաշնային միգրացիոն ծառայությունը 2093 դիմումի դեպքում որոշումն անփոփոխ է թողել՝ ՌԴ տարածք մուտք գործելու իրավունքը վերականգնելու համար հիմքերի բացակայության պատճառով: 697 դեպքում ՌԴ տարածքից վտարելու մասին դատարանի որոշման առկայության պատճառով մուտքն արգելվել է (ենթակա է բողոքարկման միայն դատական կարգով):
ՌԴ միգրացիոն օրենսդրության խստացումներով պայմանավորված` վերջին շրջանում բազմաթիվ ՀՀ քաղաքացիների նկատմամբ ՌԴ մուտքի արգելք է սահմանվել: ՀՀ ՏԿԱԻՆ միգրացիոն պետական ծառայության (ՄՊԾ) և ՌԴ դաշնային միգրացիոն ծառայության (ԴՄԾ) միջև ձեռք բերված պայմանավորվածության համաձայն՝ ՄՊԾ-ն հավաքագրում է ՀՀ քաղաքացիների՝ ՌԴ մուտքի արգելքը վերանայելու վերաբերյալ դիմումները` կից փաստաթղթերի հետ, և փոխանցում է դրանք Ռուսաստանի ԴՄԾ: Վերջինը դրանք քննարկում է և որոշում՝ պե՞տք է մուտքի արգելքը հանել, թե ոչ: Նշված աշխատանքներն իրականացվում են 2014թ. մայիսի 28-ից:
Ավելի վաղ ՊՄԾ ղեկավար Գագիկ Եգանյանը հայտնել էր, որ Ռուսաստան մուտք գործելու արգելքի բողոքարկումն ավելի հեշտ կլինի Հայաստանի քաղաքացիների համար, քան այն երկրների քաղաքացիների, որոնք ԵՏՄ անդամներ չեն: Նրա խոսքով՝ եթե այդ երկրների քաղաքացիներն անցնում են բարդ ու երկարատաև ընթացակարգ, ապա Հայաստանի դեպքում Ռուսաստանը համաձայնել է ընդունել դիմումները, որոնք ներկայացվել են հայկական միգրացիոն ծառայություն և ստուգել մարդկանց անձնական գործերը:
