ԵՐԵՎԱՆ, 24 հունվարի- Sputnik. Բրիտանիայի Վուսթեր քաղաքում մի կին հայտարարել է, որ պատահմամբ լվացել է իր վիճակախաղի տոմսը, որը 33 մլն ֆունտ է շահել, հաղորդում է Guardian-ը:
Երբ Բրիտանական ազգային վիճակախաղի կառավարող ընկերությունը՝ Camelot-ը, հայտարարել է, որ թվերի շահած համակցությամբ տոմսը գնել են Վուսթեր քաղաքում, կինը պատռոտված թղթի կտորը ներկայացրել է այն թերթի կրպակ, որտեղից գնել է տոմսը: Նա պնդել է, որ տոմսը մնացել է ջինսե տաբատի գրպանում, որն էլ լվացել է լվացքի մեքենայով:
Ինչպես հաղորդել է կրպակի տերը՝ Նաթու Պատելը, Camelot ընկերությունը բացատրել է տոմսի տիրոջը, որ նա պետք է ուղարկի տոմսը՝ շահում ստանալու հարցը քննարկելու համար:
«Նա ինձ ցույց է տվել տոմսը: Քանի որ տոմսը լվացքի մեջ է եղել, այն գունաթափվել է, բայց հուսանք՝ նրանք կկարողանան գլուխ հանել»,- հայտարարել է Պատելը՝ ավելացնելով, որ պաշտպանիչ թաղանթով պատված տոմսն ուղարկվել է ընկերության հասցեով:
Նշվում է, որ տոմսի վրա երևում է թվերի շահած համակցությունը, սակայն մյուս կարևոր գրառումները ջնջվել են:
