ԵՐԵՎԱՆ, 23 հունվարի — Sputnik. Վարակված մսի օգտագործումը չի կարող մարդու հիվանդության պատճառ դառնալ, իրավիճակը պարզաբանեց ՀՀ ԳՆ սննդամթերքի անվտանգության պետական ծառայության անասնաբուժության տեսչության պետ Հովհաննես Մկրտչյանը:
Ավելի վաղ ռուսական ԶԼՄ-ներում տեղեկություն էր հայտնվել այն մասին, որ ՌԴ-ն դաբաղի հետ կապված անկայուն իրավիճակի պատճառով հունվարի 20-ից արգելել է կաթնամթերքի ու մսի ներկրումը Հայաստանից: Սահմանափակումները վերաբերում էին նաև գյուղատնտեսական մի շարք այլ ապրանքների:
Մասնագետը հայտնեց, որ դաբաղի բուժման միջոցներ չկան, կարելի է միայն պրոֆիլակտիկ աշխատանքներ անցկացնել: Եվ հենց ժամանակակից միջոցներն են օգնել, որ Հայաստանում կանխվի վիրուսի տարածումը, քանի որ հիվանդության բռնկումից հետո մասնագետները ձեռնարկել են պայքարի բոլոր հնարավոր ու անհրաժեշտ միջոցները:
Հայ մասնագետները դիմել են ռուսական կողմին Արմավիրի մարզում 2015 թվականի վերջին հայտնաբերված դաբաղի նոր տեսակի դեմ պայքարելու համար պատվաստանյութ ստեղծելու խնդրանքով:
«Վիրուսի այս նոր տեսակն առաջին անգամ հայտնաբերել են Հնդկաստանում, այնուհետև այն անցել է Սաուդյան Արաբիայի տարածք, այնտեղից էլ տեղափոխվել Թուրքիա ու Իրան: Այժմ դաբաղը հասել է նաև մեր տարածաշրջան», — ասաց Հովհաննես Մկրտչյանը:
Մինչև մարտի վերջ ռուսաստանյան լաբորատորիաներից մեկում կարտադրվի պատվաստանյութ, և երկու ամսվա ընթացքում այն կբերեն Հայաստան: Պատվաստանյութի ստեղծումը պայմանավորված է այն հանգամանքով, որ վիրուսը մուտացիայի է ենթարկվել, ու նոր պատվաստանյութ է հարկավոր:
«Հայաստանն ու Ռուսաստանը պայքարում են վիրուսի նոր դրսևորման դեմ», — հայտնեց մասնագետը:
Մկրտչյանն ընդգծեց, որ երբ նոր պատվաստանյութը Հայաստանում լինի, դրանով անպայման կպատվաստվեն ոչ միայն ռիսկային խմբում գտնվող կենդանիները, այլև՝ բոլորը կենդանիները:
