ԵՐԵՎԱՆ, 23 հունվարի — Sputnik. Սևծովյան տնտեսական համագործակցության կազմակերպության (ՍԾՏՀԿ) նիստն անցկացվել է Ստամբուլում: Նիստի ժամանակ որոշվել է, որ կազմակերպության հաջորդ կես տարվա նախագահությունն անցնում է Ռուսաստանի Դաշնությանը:
«Հիմնական խնդիրն է տարածաշրջանում առկա բարդ պայմաններում փորձել ՍԾՏՀԿ շրջանակում դրական օրակարգ ձևավորել` ընդգծելով տնտեսական ուղղվածությունը, կոնկրետ արդյունքների հասնելու միտվածությունն ու կազմակերպության շրջանակում համագործակցության ապաքաղաքականացումը», — նիստից հետո ասել է Ռուսաստանը ներկայացնող ՌԴ ԱԳՆ տնտեսական համագործակցության դեպարտամենտի տնօրեն Եվգենի Ստանիսլավովը:
Նա ընդգծել է, որ Ռուսաստանը ՍԾՏՀԿ-ն որպես հարթակ չի դիտարկում Թուրքիայի հետ երկկողմ խնդիրներ քննարկելու համար ու հույս ունի, որ թուրքական կողմն էլ է այդպես վերաբերվում այս կազմակերպության աշխատանքին:
Ստանիսլավովը հայտնել է, որ ՍԾՏՀԿ-ում Ռուսաստանի նախագահության խոշորագույն եզրափակիչ միջոցառումներից կդառնա արտաքին գործերի նախարարների խորհրդի նիստը, որը կկայանա Սոչիում հուլիսի 1-ին:
Պատասխանելով Sputnik-ի թղթակցի հարցին՝ Ստանիսլավովը նշել է, որ Ուկրաինան շարունակում է քաղաքականացնել Ղրիմի թեման ՍԾՏՀԿ-ի շրջանակում, նա այդ մոտեցումն անհեռանկարային է անվանել:
«Ղրիմն ու Սևաստոպոլն ընդգրկվեցին Ռուսաստանի կազմում, սակայն դրանից հետո էլ ՌԴ-ի այդ սուբյեկտները շարունակում են Սևծովյան տարածաշրջանի մի մասը մնալ, և այդ պատճառով ՍԾՏՀԿ շրջանակում համագործակցությունը պետք է ընդգրկի նաև Ռուսաստանի այդ տարածաշրջանները, ինչպես օրինակ՝ Կրասնոդարի երկրամասն ու Ռոստովի շրջանը: Սակայն այդ հարցում մենք բախվում ենք Ուկրաինայի մեր գործընկերների բավական քաղաքականացված ու զգացմունքային դիրքորոշմանը»:
