ԵՐԵՎԱՆ, 21 հունվարի- Sputnik. Վրաստանի էներգետիկայի նախարարությունը «Գազպրոմի» հետ կշարունակի գազի առաքումների վերաբերյալ բանակցությունները, նշված է գերատեսչության տարածած հաղորդագրությունում:
«Վիեննայում կայացել է վրացական կողմի և «Գազպրոմի» ներկայացուցիչների հերթական աշխատանքային հանդիպումը: Բանակցությունների թեման չի փոխվել, և աշխատանքային գործընթացը շարունակվում է՝ կողմերի համար ընդունելի պայմաններ համաձայնեցնելու նպատակով»,- նշված է հաղորդագրությունում:
Ընդդիմությունը նախկինում կոչ էր արել էներգետիկայի նախարարությանը հրաժարվել ռուսական գազից: Սակայն գերատեսչության ղեկավար Կախա Կալաձեն հայտարարել է, որ ձմեռային շրջանում գազի պակասուրդ է լինում և ռուսական գազից հրաժարվելը կարող է բացասական ազդեցություն ունենալ երկրի բնակչության վրա:
Վրաստանի և «Գազպրոմի» միջև բանակցություններն ընթանում են 2003թ.-ի պայմանագրի հիման վրա, որը թարմացվում է ամեն տարի:
