ԵՐԵՎԱՆ, 18 հունվարի- Sputnik, Դավիթ Գալստյան. Հայաստանի մայրաքաղաքը շարունակում է կորցնել իր պատմական դեմքը՝ այս անգամ զրկվելով Արամի և Աբովյան փողոցների խաչմերուկում գտնվող ևս մի հին շենքից: Քանդել են նոր նախագծի շրջանակում, որը, որքան էլ տարօրինակ հնչի, կոչվում է «Հին Երևան»: Ենթադրվում է, որ այն վերստեղծելու է 19-20-րդ դարերի Երևանի ճարտարապետական տեսքը՝ այդ հատվածում պատմական ու մշակութային արժեք ներկայացնող մի քանի տասնյակ շենքեր ու ճարտարապետական շինություններ վերականգնելու միջոցով:
Նոր համալիրը կզբաղեցնի Աբովյան-Բյուզանդ և Արամի-Կողբացի փողոցների հատման հատվածը: Բոլոր «խարխլված» շենքերը կքանդվեն:
Այնտեղ, որտեղ շինարարություն է ընթանում, ոչ հեռու աշխատող բուլդոզերի մոտ մի կին էր կանգնած, որը ձեռքով փակել էր դեմքն ու կրկնում էր. «էս ի՞նչ են անում, ի՜նչ են անում…»
Ինչպես պարզվեց, Սուսաննան բնիկ երևանցի է և լավ է հիշում, թե ինչպես է փլատակների տեղում «թամանյանական» շենք եղել, որը ճարտարապետ Ալեքսանդր Թամանյանի գլխավոր հատակագծի մի մասն էր:
«Ի՞նչ է նշանակում քանդել քաղաքը ու դրա փոխարեն այսպես կոչված «Հին Երևան» կառուցել: Դա նորմալ չէ, նրանք գեղցիներ են: Բարբարոսություն է իսկական հին Երևանը քանդելը: Հանուն ինչի՞ են քանդում: Հանուն այդ անճոռնի շենքերի: Գոնե անօթևան մարդկանց համար շենքեր կառուցեին, բայց ոչ, կառուցում են վաճառելու համար, դրանից սիրտս արյունով է լցվում»,- ասում է Սուսաննան:
Նրա խոսքով՝ Թամանյանը հասկանում էր, որ չի կարելի Փոքր կենտրոնում բազմահարկ շենքեր կառուցել, ուստի այստեղ եղել են միհարկանի կամ երկհարկանի շենքեր, չէ՞ որ եթե երկրաշարժ լինի, այդ ամենը ավերակների կվերածվի:
«Հին Երևան» եռամյա նախագիծը ֆինանսավորում է «Ֆրանկ Մյուլլեր» ընկերության ղեկավար, հայազգի գործարար Վարդան Սերմաքեշը, ով այս նախագծում շուրջ 150 մլն դոլար ներդրում է կատարել:
Շատ ճարտարապետներ, մասնավորապես Ճարտարապետների միության նախագահ Մկրտիչ Մինասյանը նույնպես դեմ են նման կոմերցիոն մոտեցմանը՝ վկայակոչելով այն, որ այդ նախագիծը Թամանյանի սկզբնական մտահաղացման մեջ չկար:
Մինասյանի խոսքով` հին քարերով շարված պատերը չի կարելի հին Երևան անվանել, առավել ևս, որ Թամանյանի նախագծով դրանց փոխարեն պետք է կանաչ գոտի լիներ: Հաշվի առնելով մայրաքաղաքի մշակութային տեսքի «պահպանման» նախորդ փորձը՝ միայն մի բան է անցնում մտքովդ. «Քանդելը նրանց մասնագիտությունն է, ովքեր կառուցել չգիտեն»:
