ԵՐԵՎԱՆ, 18 հունվարի- Sputnik. Հայաստանի մարդու իրավունքների պաշտպան Կարեն Անդրեասյանը Facebook սոցիալական ցանցի իր էջում պատմել է, թե ինչու է լքում պաշտոնը: Անդրեասյանն իր հրաժարականի մասին հայտարարել է հունվարի 12-ին՝ չբացատրելով պատճառները: Օմբուդսմենի հրաժարականը տարբեր ենթադրությունների առիթ է դարձել:
«Ամենակարճ ու հիմնական պատճառն այն է, որ եթե 2016 թվականին էլ հենց ես մնայի Օմբուդսմեն, ապա այս կարևորագույն ինստիտուտն այլևս չէր լինի այնքան արդյունավետ, որքան դարձել էր երկար տարիների չարչարանքի շնորհիվ: Պատկերացնում եմ չարախոսներին, որ այս տողերից հետո ավելի մեծ կատաղությամբ կսկսեն պախարակել մեր կատարած նախկին աշխատանքը, բայց հուսամ՝ նրանք կփորձեն նաև այլ եղանակներով վաստակել իրենց օրվա հացը»,- գրում է Անդրեասյանը:
Նրա խոսքով՝ երբ 5 տարի առաջ զբաղեցրել է միակ ցանկալի պետական պաշտոնը, ղեկավարվել է օրենքի առաջ բոլորի հավասարության կարևորագույն սկզբունքով:
«Որպես պրակտիկ մարդ` ես էլ գիտեմ‚ որ սա ամենադժվար իրականացվող նորմերից է: Որպես իրատես` չեմ կասկածում‚ որ այս առաքելությունն իրականացնելիս ավելի հաճախ դառնում են քննադատության թիրախ‚ քան արժանանում հիացմունքի: Բայց որպես լավատես` ես հավատում եմ‚ որ «կաթիլը քար է ծակում»,- գրում է Անդրեասյանը:
Նրա խոսքով՝ անցած իր իդեալիզմը «մաշվել է», բայց այն նաև օգնել է նրան ամենածանր օրերին:
«Ես անսահման մարդկային բարություն եմ տեսել այս տարիներին և հատկապես այն մարդկանց մոտ, ովքեր ամենածանր կացության մեջ են եղել»,- գրել է Անդրեասյանը:
