Լաուրա Սարգսյան, Sputnik.
Էթիկայի կանոններն իմանալը միշտ եղել ու մնում է արդիական` հաշվի առնելով, որ էթիկան, ըստ էության, երիտասարդ գիտություն է: Այսօր ցանկության դեպքում կարելի է գուգլ որոնողական համակարգում փնտրել ու գտնել տարբեր կանոնների ու հարցերի վերաբերյալ ձեռնարկներ: Միայն թե համացանցը սոսկ տեսական գիտելիքներ է տալիս, իսկ գործնականում ամեն ինչ այլ կերպ է:
«Ռեստորան գալիս են մարդիկ, ովքեր կարող են ձուկ պատվիրել քաղցր գինով: Հասկանու՞մ եք, քաղցր գինին քաղցրավենիքի հետ են օգտագործում: Ձկան հետ հարկավոր է դառը գինի։ Սակայն մենք չենք կարող հաճախորդին անհարմար վիճակի մեջ դնել ու մատնացույց անել նրա սխալը: Ստիպված ենք լինում կատարել պատվերը», — Sputnik Արմենիա պորտալի թղթակցին պատմում է մայրաքաղաքի հաստատություններից մեկի մենեջեր Համլետ Սահակյանը:
Նման դեպքեր հանդիպում են ոչ միայն Հայաստանում, այլև ամբողջ աշխարհում: Կյանքի խելահեղ ռիթմում, արագ սննդի դարաշրջանում մարդիկ հարմարվում են պայմաններին ու հաճախ մոռանում վարվեցողության մասին: Ավելացնենք նաև տարբեր արագ սննդի կետերն ու վնասակար, սակայն համեղ «ֆասթֆուդ» հրամցնող օբյեկտների մասին: Հին ավանդույթները վերականգնելու նպատակով 2011 թվականի վերջին — 2012-ի սկզբին Գևորգ Մկրտչյանը հիմնադրեց «Էթիկայի դպրոցը», որի այցելուները մեծամասամբ երիտասարդ ու նպատակասլաց մեր համաքաղաքացիներն են:
«Հատկանշական է, որ վերջին ժամանակները մեր դպրոց հաճախում են նաև 40-ից բարձր տարիքի անձինք», — պատմում է Գևորգն ու ավելացնում, որ երկու տարվա դասընթացից հետո փոխվում են մարդկանց հայացքները, քանի որ ի սկզբանե շատերը թերահավատորեն էին վերաբերվում այս մտահղացմանն ու նշում. «ի՞նչ է, մենք չգիտե՞նք ինչպես պահել դանակն ու պատառաքաղը»: Դասընթացի ավարտից հետո նույնիսկ ամենահամոզված թերահավատների կարծիքը փոխվում է:
Դպրոցի նպատակն ու գործունեությունը քաղաքացիների մեջ էթիկայի ու վարվեցողության հիմունքները սերմանելն է, սովորեցնելն է գրագետ օգտագործել սպասքի պարագաներն ու վարպետորեն ու հաճելի զրույց վարելու արվեստը, իսկ հետագայում նաև բանակցային գործընթացում իրենց ճիշտ դրսևորելու կանոնները, մասնագետները ծանոթացնում են բժշկական էթիկետին, ազգային խորհրդանիշերին և այլն:
Դպրոցի տնօրեն Գևորգ Մկրտչյանի կարծիքով` սրանք գիտելիքների այն տարրական հիմունքներն են, որոնք անհրաժեշտ են յուրաքանչյուրին, հատկապես երիտասարդությանը։
Ինչպես խոստովանեց ինքը` Գևորգը, դպրոցը մեծ ծրագրեր ունի: Առաջիկա ծրագրերից մեկն է նման դասընթացների կազմակերպումը մարզերում, սակայն դեռ ֆինանսական հնարավորություններ չկան իրագործելու այս մտահղացումը:
Մոտ ապագայում կսկսի գործել առցանց հեռուստածրագիր, և վարվեցողության ու էթիկայի կանոնների վերաբերյալ տեսադասընթացներն ավելի հասանելի կդառնան: Այսօրվա դրությամբ դպրոցն ունի 400 շրջանավարտ, ովքեր դասընթացի առաքելությունը տարածողներն են։ Իսկ այս տարվանից մեկնարկեց դպրոցի 16-րդ հավաքը:
