ԵՐԵՎԱՆ, 16 հունվարի- Sputnik. Չնայած պաշտոնական երթուղիների բացակայությանը՝ Հայաստանում փողոցային ավտոարշավորդների թիվը մեծանում է, Sputnik Արմենիա ռադիոյի եթերում ասաց սթրիթռեյսեր Դավիթ Մնացականյանը:
Սթրիթռեյսինգ (փողոցային ավտոարշավ) առաջին անգամ սկսել են անցկացնել ԱՄՆ-ում դեռ 1940-ականների սկզբին, երբ վարորդները ստուգում էին իրենց ավտոմեքենաների հզորությունը խաչմերուկներում:
«2006թ.-ից Հայաստանում արդեն անցկացվում են օրինական մրցումներ, Ավտոսպորտի ֆեդերացիան առավելագույն աջակցություն է ցուցաբերում: Ոստիկանությունն, իհարկե, անբարյացակամ վերաբերմունք ունի փողոցային մրցարշավների (արագության գերազանցման), ինչպես ցանկացած այլ խախտման նկատմամբ»,- ասաց Մնացականյանը:
Պաշտոնական արշավներն անցկացվում են տարեկան մի քանի անգամ, որոնք կազմակերպում են ֆեդերացիան և տեղի ակումբները: Սթրիթռեյսերի խոսքով՝ ցավոք, Հայաստանում համապատասխան պայմաններ չկան մրցարշավները լիարժեք անցկացնելու համար, ուստի մրցումներն անցկացվում են Երևան-Մասիս ավտոճանապարհի մի հատվածում:
Մնացականյանի խոսքով՝ Հայաստանում անօրինական մրցարշավները (դրագ-ռեյսինգ) անցկացնում են գիշերը, սովորաբար խաչմերուկից մեկ քառորդ մղոն (402 մետր) հեռավորության վրա: Մյուս կողմից` տարածում է գտնում արշավի մեկ այլ տեսակ՝ դրիֆթը (սահել):
Պատասխանելով սթրիթռեյսինգի տարբեր ուղղությունների մասին հարցին՝ նա ասաց, որ մրցարշավի այդ տեսակի երկրպագուները բաժանվում են ըստ նախապատվությունների՝ եվրոպական, ճապոնական, ամերիկյան ավտոմեքենաների սիրահարների:
Մնացականյանը խոստովանեց, որ անձամբ շատ կցանկանար վարել 1967թ.-ի Ford Mustang:
Արշավորդը հետաքրքիր դեպք պատմեց իր փորձից, երբ 2008թ.-ին Երևանի փողոցներից մեկում հավաքվել էին տեղի սթրիթռեյսերները:
«Ես տեսախցիկով նկարում էի, և այդ պահին նկատեցի, որ մեքենաների մեջ կանգնած է ծառայողական պետհամարանիշով Ժիգուլի (ՎԱԶ-2106): Ես մեծացրեցի պատկերն ու տեսա ուսադիրներով մարդկանց: Միանգամից գոչեցի. «Ժողովուրդ, ԳԱԻ-ն այստեղ է, փախա՜նք»: Այդ պահին բոլորը սկսեցին ցրվել, ինչպես «Ֆորսաժ» ֆիլմում, նստեցինք մեքենաներն ու փախանք»,- հիշում է նա:
Մնացականյանն այն սակավաթիվ մարդկանցից է, ովքեր ուրախ էին, որ Ամանորին Երևանի փողոցները չեն մաքրվել ձնից։
«Մեքենաները հիանալի սահում էին»,- նկատեց նա:
